Castros do concello de Lugo-1

Esta ruta forma parte do proxecto persoal de unir mediante rutas en coche e curtos paseos os castros catalogados do concello de Lugo.

Esta primeira ruta pasa por 6 castros situados entre o río Miño, a N-540 e a estrada a Friol (LU-232). O inicio está xunto á vella potabilizadora e o final na ponte de Ombreiro.

As outras rutas: 1, 4, sigpac.

Breve descrición dos castros a partir dos textos que aparecen no PXOM de Lugo:

1- O Castro: Situado en Taboelle, parroquia de San Miguel de Orbazai. Castro prácticamente desaparecido na actualidade. Só pode observarse un tramo no SE con restos dun terraplén defensivo. A súa forma debeu de ser oval. Cortado pola pista de acceso a Penarrubia. A casa que está sobre el chámase Casa do Castro.

2- O Castro: Situado en Penarrubia, parroquia de San Miguel de Orbazai. Castro dun só recinto semicircular, defendido por un terraplén. O interior está moi alterado por unha antiga canteira. Foi obxecto de excavacións arqueolóxicas. Arredor de 1 hectárea de superficie.

3- A Castronela: Situado en Matelo, parroquia de Sta. María Alta. Castro lixeiramente ovalado defendido por unha muralla con dobre paramento de mampostería de granito. Adosado ao recinto principal polo SW-S hai un segundo recinto, a modo de antecastro, tamén cun parapeto de terra e un terraplén polo SE.

4- A Caderna: Situado en Marcoi, parroquia de Sta. María Alta. Castro circular cunha muralla de dobre lenzo e mampostería de granito.

5- A Rodela: Situado en Vilaverde, parroquia de San Salvador de Outeiro. Castro cun só recinto con parte de parapeto e foxo. Case unha hectárea de superficie.

6- Castro Zapateiro: Situado en Cristimil, parroquia de San Martiño de Ombreiro. Castro que ocupa un pequeno esporón na ladeira dunha dorsal configurado por un só recinto e defendido por un terraplén ao arredor, e restos dun parapeto con foxo en gran parte do recinto. Obsérvase algún corte na estrutura defensiva que permite ver a existencia dunha muralla pétrea. Na foto aérea é case indetectable, pero apréciase moito mellor in situ. ACTUALIZACIÓN (2015): As árbores que o cubrían foron taladas polo que se aprecia moito mellor a estrutura do castro.

Feita en decembro de 2012 por Lucía e Jose.

Os arquivos coas mámoas do concello de Lugo son:

Mámoas 1
Mámoas 2
Mámoas 3


Outros restos arqueolóxicos do concello de Lugo non catalogados como castrexos nin mámoas son:

Outros restos do concello de Lugo