20200221 Zumaia Karakas GR121 Garategaina Getaria Askizu Zumaia

Zumaiako polikiroldegian hasi eta bukatzen den goiz buelta polita, jarraitzeko arazorik ez daukana.
Polikiroldegian hasi eta Santiago hondartzarantz abiatuko gara (guk Gernika pasealekua hartu dugu, baina zuzen joan daiteke). Zuloaga espazioa pasatuta, bidea gurutzatu eta Karakas Nekazalturismora eramango gaituen bidea hartuko dugu (eskubira; gero ezkerreko aldapatik bueltatuko gara). Baserri hau pasa ondoren asfaltoa utziko dugu eta gorantz hartuko dugu mendiko pistatik. Eskubitan Golf-ean praktikatzeko zelaitxo bat ikusiko dugu eta hau bukatzean, aurreran hezia ikusten dugunean, ezkerrera gora egingo dugu, pista jarraituz. Mahastiak pasatuta, aldapa bukatzean Zumaia eta Zarautz lotzen dituen mendibidearekin (GR-121 etapa) elkartuko gara.
Bide hau laister porlanezko pista batekin elkartuko da, baina porlanatik ehun metro egin baino lehen ezkerrera hartuko dugu, GR marka zuri-gorriak jarraituz. Beste 200 bat metro eginda, Garatemendi tontortxoaren goiko aldera helduko gara eta hemen bidegurutze bat hartuko dugu ezkerrera, maldan behera.
Laister Getariako herrira helduko gara, baina hemen 100 metro baino ez dugu egingo, laister ezkerrera jo eta Askizu aldera doan harrizko galtzada hartuko bai dugu.
Errepidera heltzen garenean, ezkerrera joko dugu, Askizu auzorantz eta San Prudentzio auzoko bidegurutzea pasa ondoren apur bat behera egingo dugu eta laister Askizurantz zuzenean igotzen den bide bat hartuko dugu ezkerrera.
Askizu auzoan ezkerrera hartu eta laister GR121 bidea berriz ikusiko dugu, baina oraingoan eskubira joko dugu, Zumaia aldera. Denbora laburrean Zuloaga espazioan egongo gara berriz, aurretik esan dugun bidegurutzean.
Guk hemen hondartzara jo dugu eskubitik, bertako bi itxasargi txikietatik pasatuz eta gure txangoa apur bat luzatuz. Bertatik lasai-lasai polikiroldegira joan daiteke.
Esan bezala, zailtasunik gabeko txangoa, polita eta jarraiterraza.