2021-11-01 Bortal

Bortal izeneko aldea Gorbeiako Parke Naturalean dago eta erreserba integral gisa izendatuta dago, ingurune natural batean ezar daitekeen babes-figurarik handiena. Gorbeialdean bi erreserba integral daude, biak Altubeko basoaren bihotzean: bata Peña Iñurbe da eta, bestea, gaur ezagutu dugun Bortaleko sakan hau. Eremu horietan, gizakiaren esku-hartzea eten egin da, eta, beraz, denborarekin, soilik modu naturalean eboluzionatuko dutela espero daiteke. Ehiza, arrantza, eraikuntza edo kanpaldi librea ere ez dago baimenduta.

Ziorragatik abiaturik, errepidea zeharkatu eta Intxustapera doan pista hartu dugu. Lehenengo bidegurutzean, behera doan bidea hartu eta Errekabasterra baserrira iritsi gara, berehala Bortal errekaren sakanean sartzeko. Bortal hitzak gurbitza esan nahi du, eta hainbat ale ikusiko ditugu ibilbidearen lehen zati honetan.

Igoerari ekin diogu, batzuetan nahiko aldapatsua izan dena, eta bideak mendilerrora eraman gaitu. Orain haritz ederren artean ibili gara, Amediano kota xumearen gailurreraino. Aurrera jarraitu, altuera hartu eta hemendik aurrera erabateko protagonismoa hartu duen pagadian sartu gara. Ekarri dugun bidetik pixkat desbideratu, eta Haginamendira iritsi gara. Han pagoak baino ez daude, hagin arrastorik gabe.

Burbonarantz jarraitu dugu, lehenengo erdiko kota eta gero mendebaldekoa. Azken horretatik Andotoletarainoko tartea oso ederra izan da, pagoen artean ibili gara, bakardadean, ageriko biderik gabe, gure oinek orbelaren gainean sortu duten soinua lagun.

Andotoletan ez dago buzoirik, bai, ordea, lubaki arrastoak. Hemendik Ziorragara jaistea besterik ez zaigu geratzen. Mendikat-ek adierazten du bidetik oso gertu Altubeko kota txikia dagoela. Hurbildu gara, baina zinez ez du merezi, bidea ezeroso samarra da, sasien eta iratze handien artean.

Kotxerainoko azken zatia baso-lanek hondatutako pistetatik egin dugu, interesik gabeko jaitsiera.

Ibilaldi ederra, Gorbeialde ezezagunenean barrena.