A Peroxa. Circular dende Gulfariz

Interesante pateada feita a partir desta: https://gl.wikiloc.com/rutas-sendeirismo/a-peroxa-comarca-de-ourense-ourense-pr-g-179-ruta-circular-do-rio-mino-70358164, aínda que modificando o punto de comezo para non rematar en subida (acerto!). Gulfariz é unha aldeíña onde remata a pista estreita que lle da acceso. Lugarexo pintoresco e moi abrigado polo que a vexetación mostra un estado primaveral moito máis avanzado que en zona altas. Mágoa que, como outras da ruta e como adoita pasar pola Galiza adiante, se vexa despoboada e bastante ruinosa... Xusto na entrada, hai un espazo onde estacionar tres ou catro coches.
A ruta percórrese en sentido antihorario para facer a subida máis a modo. Comeza cunha pequena baixada ata a vía do tren para logo ir subindo por entre viñas (ben delas a monte) e carballeiras (aquí o GPS toleou un pouco, pero non hai perda). Logo de costear Mereixe e subir outro treito chégase a carballeira e capela do Amparo, un fermoso lugar con moi boas vistas sobre o Miño.
Logo dunha notable subida, xa se chega á parte alta, sensiblemente chaira. Pásase por varias pequenas aldeas para chegar á capitalidade municipal. Aquí pode aproveitarse para "avituallarse" nalgún dos establecementos de hostalería. O bar de tapas O Castelo foi unha boa opción.
A partir de aquí comeza o trazado da Ruta do Miño que, logo de pasar polo Castelo da Peroxa, atravesa as aldeas de As Portelas, Paín e Pousada e chega ata Gulfariz. Toda esta esta parte é de forte baixada.
O percorrido vai case na súa totalidade por camiños, carreiros e pistas. En xeral está limpo; tan só algo de herba ou polas nalgún treito curto, moi pouco. Coincide con treitos sinalizados de rutas e non é difícil de seguir, pero guiarse polo GPS sempre axuda.
Considero que é unha ruta desaconsellable para días de moita calor por ir por unha zona moi abrigada. Por contra está ben para días frescos ou incluso de mal tempo. Probablemente as mellores épocas sexan a primavera e o outono, cuestión de gustos...
A camiñada permite gozar de fermosas paisaxes, da vexetación, da cultura do viño, da arquitectura das aldeas e tamén da máis elaborada dos sitios relixiosos ou señoriais.
Tal como queda apuntado, a principal dificultade derívase do desnivel; tanto pola (relativa) dureza das costas coma polas petadas de baixada. O desnivel é menor do rexistrado polos fallos do GPS. Andará sobre os 500m