A Pontragha-A Sionlla OLLO!

*** ATENCIÓN, PERIGO (17/01/2021): Os tuneis están en mal estado, sobre todo entre Berdía e a Sionlla, hai desprendementos e nun veuse abaixo unha parte grande da bóveda, quedando aínda pendurados do teito anacos de cemento de gran tamaño que poden caer en calqueira momento***

No que se refire á ruta, transita pola vía vella da Coruña - Santiago dende a estación da Pontragha ata a da Sionlla. Hai tramos moi limpos, os menos, outros con silvas baixas, xestas, árbores caídas... outros onde a maleza supera os dous metros pero se hai vontade de fozar, fózase e avánzase, e outros que son intransitables a non ser que se leve un machete ou unha desbrozadora. Ata chegar a Berdía hai que buscar continuamente alternativas por leiras, monte ou pistas; de alí en diante hai tramos complicados, pero pódese facer sen desvíos.

A ruta pode resultar moi cansada tanto pola loita coas silveiras como polo firme de balastro.

Pásase por 4 tuneis (3 no tramo Berdía - Sionlla) e varias pontes e antigas estacións, todas en ruínas. Os tramos á beira do río Lengüelle son especialmente bonitos, hai moitas carballeiras e algún souto (e eucaliptos tamén, claro).

A tradición de guindar electrodomésticos e entullo no monte parece seguir moi arraigada na zona, puidendo observar anacos de exemplares de vidé ou lavadoras en lugares realmente recónditos.

O traxecto finaliza na estación da Sionlla, pero o noso track continúa ata onde tiñamos o coche.

* Recomendable levar luz para os tuneis e pantalón e manga longa.

** A ruta ten moito potencial, momentos moi bonitos e partes moi asequibles (sobre todo nos inicios), pero no estado no que están os túneis non parece seguro andar por eles e o abandono total fai que non sexa apta para tódolos públicos.