A Seara - Lago de Lucenza (O Courel)

Ruta de pouca distancia e sinxela, se ben o último quilómetro e medio antes de chegar ao lago de Lucenza ten algún tramo algo duro.

Na estrada que une Ferramulín coa Cruz de Outeiro, á altura do desvío para A Seara, atopamos o panel de información coa ruta. O máis salientábel da ruta son as fervenzas que imos atopando e, obviamente, o propio lago, pero as vistas tamén son espectaculares, sobre todo a medida que nos achegamos ao lago.

Ao pouco de comezar, a uns douscentos metros, vemos á esquerda a fervenza do Fócaro (caída duns 30 metros e con caudal constante todo o ano), realmente fermosa e á que se accede por unha ponte de lousas sobre o río. O camiño continúa paralelo ao río Selmo, en ascensión suave. Máis adiante e logo de cruzar o rego de Porto Mourelos grazas a unha pontella de madeira, podemos observar á nosa esquerda unha caída de auga de bastante altura (seica uns setenta metros), coñecida como fervenza de Navaregas, e a seguir temos o desvío para acceder ao Fondo da Petada, cunha senda estreita pero moi sinxela, sen desnivel. O desvío para ver a fervenza do Fondo da Petada paga a pena (nós fixémola á volta, no descenso). A partir de aquí o desnivel aumenta e a ascensión faise algo dura. Finalmente, o lago de Lucenza, de orixe glaciar. De continuarmos polo camiño, aproximadamente nun quilómetro estariamos na campa de Lucenza, lugar de encontro das pistas que veñen do Alto do Couto e Formigueiros, a de Pia Paxaro, a pista que leva ao miradoiro de Polín e logo a Parada e a Ferreirós ou mesmo o camiño que se dirixe cara á devesa de Rogueira e as fontes do Cervo (que tamén vale para ir a Polín).

Logo do descenso, paga a pena dar un paseo pola aldea da Seara, unha das mellor conservadas (e rehabilitadas) do Courel, e na que tamén podemos ver outra interesante caída de auga.

Indicamos tamén no mapa a fervenza de Vieiros (uns 20 metros de caída e con caudal todo o ano, e á que se pode ir por un camiño que parte da Seara ou ben acceder directamente dende a estrada (está indicado o acceso e a fervenza xa se enxerga dende a propia estrada). De escoller esta última opción, nuns cincocentos metros estamos na fervenza.