A Serra de Pena Corneira, un Monumento Natural

O noso roteiro transcorre polo espazo natural da Serra de Pena Corneira, declarada Monumento Natural no ano 2007. A Serra abrangue parte dos concellos de Avión, Leiro e Carballeda de Avia, indo a nosa andaina case toda por Leiro agás a subida ao cumio de Pena Corneira que está en terras de Carballeda de Avia.

Os punto senlleiros do percorrido son:

PENA CORNEIRA

Trátase dun macizo granítico no que a diferente evolución xeomorfolóxica das súas rochas deu lugar a unha complexa asociación de formas que xera unha paisaxe contrastada de singular beleza, coronando a parte norte deste a espectacular Pena Corneira.

Gran parte de Galicia está constituida por granito, pero non todos os granitos son iguais, nin se formaron do mesmo xeito. O batolito de Pena Corneira formouse cando unha grande masa de magma enfriouse moi lentamente e a relativa profundidade, sen conseguir achegarse á superficie.
O proceso de enfriamento durou milleiros de anos e produciuse baixo unha enorme presión. Unha vez enfriado o magma, os movimentos da codia terrestre fracturaron as rochas producíndose liñas de fracturas en forma de cubos. Pola auga e a erosión as rochas pouco a pouco vanse redondeando ata formar os bolos que cando están en pendente rodan e espallándose polo monte forman estas paisaxes.

Esta especie de menhir natural que é o cimo de Pena Corneira apunta ao ceo sendo visible dende boa parte da comarca do Ribeiro.


O arboredo está constituido na súa meirande parte por carballo e rebolo, acompañados por outras frondosas como o castiñeiro, salgueiro, ameneiro, a sobreira nas zonas baixas e o bidueiro nas partes altas.

IGREXA DE SANTA MARÍA DE LAMAS

Esta igrexa románica do século XII atópase nos arredores de Pena Corneira e consta dunha soa nave. Na fachada principal ten un arco lixeiramente apuntado con duas arquivoltas. Na ábsida hai duas pequenas fiestras e a cornixa está decorada con canzorros.

IGREXA DE SANTO TOMÉ DE SERANTES

Está datada no ano 1170 e o máis interesante da súa factura atópase na fachada divida polo quitachoivas, presentando un rosetón, porta baixo dúas arquivoltas lixeiramente apuntadas e tímpano con pombas e dous persoeiros. Os aleiros están pousados sobre canzorros cunha moi variada serie de altorrelevos, con figuras humanas en posturas grotescas. O intradorso tamén presenta esta mesma decoración.

Moi importante no interior é o baldaquino do lado dereito da nave, do século XV, representando en relevo a San Pedro e San Pablo no frontal e A Anunciación no lateral. No altar maior hai un retablo barroco co escudo dos Sarmiento de Ribadavia.

EIRAS DE HÓRREOS

Nos lugares de Paredes e Corneira veredes concentracións de hórreos para o secado e almanaxe de gran.