Abrigo con pinturas rupestres de La Mela. Sorbas. Almería

Rutiña para coñecer a cova con pinturas rupestres do barranco de La Mora, perto da localidade de La Mela (Sorbas). Nin a ruta nin o abrigo están sinalizados, polo que hai que deixarse guiar polas persoas que compartiron itinerarios nesta páxina. Neste caso seguíuse, en parte, este track: https://gl.wikiloc.com/rutas-outdoor/la-mela-pinturas-ruestres-20379264?utm_medium=app&utm_campaign=share&utm_source=1278070
A camiñada comeza a carón da estrada A-1101"Carretera de Sorbas a Zurgena". Aquí comeza un camiño que vai cara unhas fincas e edificación. É perfectamente visíbel e hai lugar onde estacionar un ou dous coches. Séguese este camiño, logo tórcese á esquerda e finalmente azáncase a valmonte por fincas renaturalizadas e monte baixo. Dadas as características climáticas e botánicas da zona, non é dificil pasar.
Dende o borde da barronca, temos unhas interesantes vistas da orografía da mesma e dos arredores. Báixase sen grande dificultade, buscando o percorrido máis a xeito. É cuestión de ir a modo e mirando.
Xa no fondo da carricova tampouco é complicado camiñar xa que hai algo de carroucho e tamén o coiñal dos arrastres da auga. Séguese cara a esquerda, é dicir, no sentido no que corre a auga (cando hai). Vense restos de cultivos coma granados ou oliveiras, xa abandonados vai tempo pero que se resisten a morrer. Se é o tempo a propósito, mesmo se pode degustar algunha granada...
O abrigo das pintura está no lado esquerdo. É perfectamente localizable porque se ven o valado de postes de ferro que o pecha para defensa do contido. Sóbese con xeito ata el e pódese contemplar o contido coas limitacións da distancia á que o podemos facer e do estado da pinturas.
Trátase de deseños da arte post-paleolítca de tipo esquemático. A súa datación non está definida perfectamente. Calcúlase que son de entre os séculos VI e III antes da era común. A simple vista só se aprecian algúns trazos, en especial un grellado en romboides, formas de ramos ou figuras humanas. Tamén hai dúas figuras de cabalos, polo que a cova tamén é coñecida como "del Caballo". Nesta ligazón hai un excelente traballo de estudo da cova, onde documentarse: https://www.revistacuadernosdearteprehistorico.com/index.php/cdap/article/view/142/164
Igualmente na páxina de Facebook do Concello de Sorbas hai unha entrada sobre o abrigo: https://www.facebook.com/ayuntamiento.desorbas/posts/2819029565030529/
A volta foi polo mesmo camiño. Cabe facer rutas circulares, coma a sinalada ao comezo.
Percorrido interesante tanto pola paisaxe pola que decorre coma, sobre todo, por visitar un xacemento moi pouco coñecido.