Polo río Lérez: mosteiro de Acibeiro - Forcarei

Ruta entre o mosteiro de Acibeiro e Forcarei seguindo o río Lérez. Ruta lineal, para regresar ao punto de partida pódese coller un taxi en Forcarei (pódese reservar con antelación e cobran 12 euros).
Fixemos a ruta a finais de novembro, con bastante caudal no río e cos efectos dunha boa crecida nas semanas anteriores que afectou bastante á ruta. Ademais das consecuencias desas crecidas, vese ben que non hai limpeza nin mantemento da ruta dende hai anos, moitas das árbores caídas xa levan tempo, hai zonas con silveiras nas que cómpre andar con ollo...
Cómpre ter moito tino no treito entre os km 7,7 (ponte da Carballa) e 8,4 (muíño) porque co piso mollado é grande o risco de caída ao río. O chan está cuberto de follas nas que non é difícil escorregar e ademais practicamente non existe a senda, imos camiñando manténdonos lateralmente na pendente e case que non hai agarre ningún (poucas árbores á man e bastantes silvas).
A partir do km 7 practicamente non nos separamos do río. Os verdes dos musgos que cobren as pedras son todo un espectáculo e os bosques que imos atravesar sorprenden pola ausencia nas proximidades de eucaliptos e piñeiros, atravesamos carballeiras amplas moi próximas ao río.
No km 9,5 hai unha boa zona de descanso na área de lecer da ponte do Crego. Ao deixar esta ponte hai unha pequena subida na que tamén se aprecia claramente a falta de mantemento, unha roza mínima deste anaco de pista evitaríanos andar pendentes de onde colocamos as botas entre as silvas. Seguimos logo á beira do río, con varios muíños abandonados e chegamos a unhas poldras (km 10,7) nas que temos que atravesar o río: a nós enganounos o gps, semellaba que a ruta continuaba pola mesma marxe do río e obrigounos a dar volta logo de ir inventando camiño (habería que restar medio quilómetro do total da ruta, que foi o que nos ensarillamos nesta zona).
No km 11,9 pasamos onda as instalacións do campamento xuvenil da Xunta en Pontemaril e atravesamos a ponte para seguir un anaco da estrada asfaltada, soamente douscentos metros para desviarnos á esquerda e volver ao río.
Na área de lecer do Cotelo e dado que se nos facía tarde, cortamos a ruta e tiramos cara a Forcarei, na procura da famosa richada do restaurante Victoria para redondear unha xornada ben aproveitada. Haberá que retomar a ruta nesa área de lecer e seguir descendendo co Lérez.