Altzo - Arteota - Mizpirigaina - Altzo

20 MAR 2021 09:15

Lasai ibilita, lau ordu t'erdi edo bost ordu inguruko goizpasa polit bat egiteko ibilbidea.

Ibilbide honetan Altzoko harrobia inguratuko dugu, berez harrobiaren zarata ibilbidearen zati "txikian" (?) gurekin izango dugularik. Oso interesgarria da justu harrobi gainean dagoen artadia, ez baita oso ohiko baso mota bat barruko gure inguru hauetan.

Ibilbidea Altzoko herrian hasiko dugu, GR-21 tik barrena. Nik, zehazki, eliz atzean dagoen parke pareko asparkalekutik. Abiapuntu honetan, errepide nagusia utzi eta eskuineko bide asfaltatua hartuko dugu.

500 bat metrotara edo bidegurutze bat aurkituko dugu. Bertan, ezkerretara gora hartuko dugu eta utzi gabe, Goikoetxewa basarri ondotik igarota, gas zentrala dagoen punturaino iritsiko gara ( 02 - Arrimagagoikoa ). Hemen, gogoa izanez gero Elordi muinora igo gaitezke eta Altzo gaineko ikustaldi ederraz gozatu.

Arrimagagoikoan eskuineko gurdiubidea hartuko dugu eta Otsabioko bidegurutzea utzi eta aurrera egingo dugu.

Artarain inguruan berriro beste bidegurutze batekin egingo dugu topo. Hemen eskuinera behera hartu behar dugu, itxuraz goruntz doan bidea utzita. Puntu honetatik aurrera, artadira sartu eta harrobi gainetik joango gara.

Bidean Arteotako zelaira iritsitakoan Arteota tontorrera igoko gara. Bi tontor bixki antzekoak ditu. Biderik erosoena, jaitsi nintzen bidetik igo eta jaitsita izango litzateke.

Berriro GR-21 berreskuratu eta Azkarate aldera jarraituko dugu. 07 bidegurutzera iritsitakoan, eskuinetik behera doan gurdibide zabala hartu behar dugu. Ni hara iritsitakoan pago sorta batek bidea ixten zuen eta horregatik goitik desbideratu nintzen.

Behin bidean aurrera eginda 08 bidegurutzera iritsiko gara. Bertan, belazera pixka bat sartuta, Aralarrek eskaintzen digun ikusmiraz gozatu dezakegu. Bista hau izango dugu Ezupelgo gaina arte.

Bide horretan Jazkuegina eta Zugastigaina tontorrak egin ditut, baina egia da larrak hartuta daudela eta oso bide zikina pasa behar izan dudala. Lan horretan sartu nahi ez baduzu, jarraitu pista aurrera.

Mizpiragaina oso tontor irekia da eta lehen esan bezala, oso ikusmira ederrak ditu Aralar, Otsabio eta Gipuzkoako hainbat lekuetara. Benetan merezi duen muinogain ederra.

Ezulpeko gainea igotzeko ere zailtasunik ez dago. Bertan Foru Aldundiaren poste geodesiko bat dago.

Puntu honetan, berriro atzera egin eta gurdibidean beherantz joan gaitezke. Ni, berez, hesturaren kontra jaitsi naiz, nire asmoa Aristizabal baserriraino jaistea baitzen, baina momentu zehatz batean, hestura horrek hara igarotzen ez dit utzi eta basoan behera egin det 19 bidegurutzean goitik zetorren bidea hartzeko.

Behin bidea hartuta, ez dugu inongo eragozpenik iozango harrobira doan errepideraino jaisteko. Errepidean harrobirantz jo behar dugu sarreraraino. Han, ezkerretara abiatzen den bidea hartu eta Etxeluze baserri ondotik pasata, oso erraz iritsiko gara berriro Altzoraino.