Ambía, paseo polo Arnoia

Camiñada con intención de facer un pequeno paseo , coa seguranza de que as paisaxes do río Arnoia nunca defraudan (e así foi). Como guía tomamos este track: https://es.wikiloc.com/rutas-senderismo/xunqueira-de-ambia-san-xillao-ruta-dos-muinos-y-pontellas-114335187
Probando a ver se se podía facer algo máis circular seguimos augas abaixo un anaco (entrando no termo de Allariz) pero a ruta limpa diverxe do río, sen trazas de poder pasar ao lado dereito deste, polo que volvemos. Nesta prolongación pásase a carón das ruínas dunha importante fábrica de luz. Mágoa de excelente construción en total desuso e sen utilidade!
A carón das ruínas dun muiño fariñeiro, Muíño do Beiro, hai un bo pasal polo que atravesamos ao lado dereito. Uns catrocentos metros máis arriba voltamos ao lado esquerdo por outro pasal.
Seguimos río arriba, atravesando a estrada OU-0102, coa intención de volver polo lado dereito, visitanto o S. Xillao (aldea, castro). Isto non foi posíbel porque o poldrado a carón das ruínas do muíño dos Capes está intransitábel: falta algunha poldra na parte central e coa caudal actual non se pode pasar. Tal vez en época de estiaxe se poida pular polos penedos caídos pero nin así parece recomendábel (opción de descalzarse tamén, con pouca auga). Este paso NON É transitábel.
Proseguimos por un sendeiro paralelo ao río pero finalmente, segundo vai gañando altura, vai separándose sen que se perciba posibilidade de atravesar ao outro lado. Volta atrás e finalización do paseo.
Queda para outra vez explorar rutas polo lado dereito do río e visitar o San Xillao. Como queda dito, a paisaxe do Arnoia sempre é un gusto en todos a cada un dos seus treitos.
Os camiños e sendeiros están limpos. Hai un anaco que coincide do Camiño de Santiago. Só ter en conta que en época de cheas as pontellas ou pasais poden estar cubertos de auga ou presentar risco.