Ancares 5: Circular Burbia-Vedual

Traducción / Translation / Traduction: oajmer@gmail.com

Ruta que sae do albergue-camping de Burbia, nos Ancares leoneses. Atravésase o pobo cara a estrada e no centro cóllese o desvío indicado "Campo del Agua". Este é un camiño ancho e sen complicacións que atravesa o río Burbia e ten postes indicadores de "La mirada circular", unha serie de camiños do Bierzo. Este tramo en concreto é da ruta "La senda de las brañas". Despois de 2 km desde a saída chegamos á indicación "As Algueiras-Campo del Agua" (punto 01) que seguimos. A partir de aquí comeza a subida que nos levará uns 5 km. No punto 02 abandonamos "La senda de las brañas" e xiramos á dereita para continuar subindo. No punto 04 deixamos a pista e metémonos cara á ladeira para chegar á crista (05). Este tramo é algo complicado xa que hai vexetación, inda que baixa (uces e carqueixas) e sempre hai unha zona máis ou menos clara pola que seguir. Outra opción podería ser tomar a crista desde o punto 03 ata o 05, pero non podo confirmar que sexa mellor.
A partir do punto 05 a subida é algo máis cómoda xa que a vexetación é inda máis baixa. Pasa por un par de fitos e por A Penouta, cunha fermosa vista do val de Burbia.
Durante todo este tramo (desde o punto 02) podemos ver o cumio do Vedual ou Navalegas que se distingue ben porque ten unha pequena caseta de vixiancia.
Desde o Vedual podemos ver toda a crista principal dos Ancares, desde o Penarrubia ata o Miravalles.
A baixada faise pola crista, primeiro por unha pista e logo por unha senda entre as uces.
Logo duns 2 km, xusto antes de chegar ao pico Campolongo, podemos empezar a baixar de novo cara ao val de Burbia.
O punto 09 (Baixada alternativa) é un camiño de baixada que non atopei no terreo pero que pode ser unha opción á ruta que seguín xa que desde o punto 10 ata o 13 non hai camiño. Hai primeiro unha zona de herba, logo xestas que dificultan bastante, a continuación rochas que poden ser esvaradizas se están húmidas e por fin unha zona de árbores (carballos e bidueiras) pola que se avanza bastante mellor. En total desde a crista ata o camiño é 1 km campo a través.
O camiño é moi ancho e sen complicacións, tan só un par de zonas de xestas pero que só molestan un pouco. Este camiño non vén no mapa topográfico!!! a pesar da súa amplitude (2-3m). Atravesa zonas de bosque, carballos, bidueiras, acivros, abelairas, ... e únese na parte final ao camiño que sube ata a Murteira/Lagos de Burbia (ou Camiño dos galegos) e logo ao Camiño de Piornedo xa no val.
A baixada desde a crista son en total outros 5 km.
Desde aquí xa só quedan algo máis de 2 km para chegar ao albergue-camping.
Considero a dificultade moderada pola lonxitude e polas 2 zonas de fóra de camiño.
Feito en febreiro de 2011 coa estupenda compaña do can do albergue (do que non sei o nome).

Outras rutas de Ancares:
1 De Piornedo a Pico Lanza por Vilarello,
2 Tres Bispos,Trapa,Brego e Cabanavella,
3 De Piornedo a Suárbol por Acevais
4 Circular Porto Ancares-Miravalles-Balouta
5 Circular Burbia-Vedual
6 Os tres cumes de Lugo
7 Da ponte de Vales a Brego
8 Club Ancares a Cela por Deva
9 Campa da Braña-Fieiró-Robledo
10 De Piornedo a Suárbol polo Chao Grande
11 A parroquia de Donís
12 Pereda-Miravalles-Pereda
13 Circular Campa da Braña a Piornedo
14 Faial de Pintinidoira
15 Degrada, Cela, Pando, Cabanas Antigas
16 Piornedo, Donís, Xantes e Vilarello