Andaina polo bidueiral de Gabín (ruta curta). Montederramo

Primeira andaina (esperemos que non sexa a última! ;-)) organizada pola Asociación Ladeiras do San Mamede ao bidueiral normalmente coñecido coma de Montederramo. Comezamos ás 9:30, en Montederramo, cun estupendo almorzo no bar O Bodegón, cargando enerxía pura coa bica manteigada da panadaría Vilanova. O día está neboento pero non frío. Saímos pola estrada que vai para as terras de Chandrexa e logo apartamos cara a área de lecer de Ponte Mazaira (ou da Palloza?). Sempre guiados por Pepe, un admirable gandeiro-resistente local, dirixímonos cara Vilanova onde collemos pola dereita sempre por camiños e pistas cara o lugarexo de Fontedoso. Continúa logo a camiñada cara zonas máis altas ata chegar á área de lecer de Campo do Casar. Avituallamento e comezamos a baixada. Asoma timidamente o sol pero non se decide. Na volta atravesamos o núcleo de Gabín e por un anaco de estrada, chegamos a Vilanova para retomar o camiño inicial. Parada para apañar cogordos-choupís-patamelas-chouparros... (ou calquera dos outros nomes que en Galicia lles damos ás Lepiotas).
Xa só queda dar conta (ata onde cadaquén pode) do memorable xantar que nos serve o restauranta Elvira: empanda, callos, e perna de vitela asada; todo da gandeiría ecolóxica do Pepe. Unha delicia! Por suposto de sobremesa a bica manteigada. Sabores de sempre e degustado no que foi un mosteiro... Quedaba logo tomar os cafés no Álvarez, pero o tempo xa non daba pois había que visitar a monumental igrexa do antigo convento (preguntar na oficina de Turismo, no Concello).
Foi mágoa que o día non axudase para poder gozar das paisaxes da zona (persoalmente coñecidas). A organización perfecta. Espero que continúe a iniciativa da andaina e que, co boca a boca, acuda máis xente, e tan agradable coma a que tomou parte nesta edición de estrea. Parabéns para @s organizadores!