Armañon, Jorrios, Ranero/Pico del Carlista. Santecilla auzotik

Ibilbide honek Euskal Herriko 100 mendi zerrendetan dauden Armañon, Jorrios eta Ranero/Pico del Carlista lotzen ditu.
Karrantzako Santecilla auzotik igotzen da.
400m inguru ibili ondoren, eskuinetik doan pista hartu dut. Erabaki okerra: luzeagoa da eta seguruenik eremu pribatuak zanpatu ditut. Beraz, ezkerrekoa hartu eta goian leku berdinera aterako gara.
Gainera atera eta gainez-gain, Kantabria eta Bizkaia arteko muga lerroan jarraitu, ekialdera. Erpin geodesikoa eta trikuharriak dauden gainera iristean (La Galupa), aurrean, urruti, ikusiko ditugu eskuinera Armañon berdea eta ezkerrera Jorrios harritsua. Ordena honetan egingo ditugu. Armañon (856m; 2h 15min).
Pausu batzuek atzera egin eta garbi ikusten den bidea jarraituz (PRa) Jorrios lepora aterako gara. Hemendik gailurrera, apatxetak eta pintura zaharra jarraituz arazorik gabe helduko gara, Los Jorrios (839m; 3h). Bidea, lehen zatia behiekin partekatzea tokatu zait eta gorago ahuntzekin.
Berriz ere PRan itzuli GRra heldu arte; orain pista jarraituz Armañon aterpe politaren ondotik pasa (irekia eta librea) eta berriz ere gainez-gain egindako bidea desegingo dugu.
Zati batean, GRa utzi eta eskuinetik egingo dugu Ranero alderako bidea.
Aurrerago GRan jarraituko dugu; esateko modu bat da, ze zenbait zatitan ez da batere erraza markak aurkitzea.
Ranero ingurura iritsi heinean markak ugariagoak dira; ibilbideak bira asko ematen ditu Ranero lepora iritsi arte.
Lepoa pasa eta metro gutxitara eskuinera ateratzen da bidexka, pintura laranjaz seinalaztatua.
Goiko lepora iritsitakoan, alde guztietan ikusten dira tontorrak. Nik marka laranjak jarraitu ditut baina ez dute balio Ranero egiteko. Lepo horretatik, eskuinera hartu behar da apatxetak jarraituz. Ranero edo Pico del Carlista (722m; 6h 40min)
Berriz Jorrios lepora jaitsi eta GRa jarraitu. Lehenik Pozalagua eta beherago Ranero auzoa. Bere erdigunetik pasa eta ipar-ekialdera doan pista zabala jarraituz helduko gara hasierako puntura: Saltecilla