As Ermidas ao Bolo. Circular por Sta. Cruz

Estupenda andaina por uns lugares moi fermosos. Feita (modificándoa) a partir desta: https://gl.wikiloc.com/rutas-sendeirismo/o-bolo-comarca-de-valdeorras-ourense-o-bolo-santuario-das-ermidas-32593440
Comeza nas Ermidas, xunto ao río Bibei, onde hai un bo estacionamento (para chegar a el seguir a indicación "turismos e autocares" na entrada da aldea). Escoller este punto como comezo ten a favor o ser un lugar senlleiro; accesible; con aparcadoiro e, sobre todo, no punto máis baixo da ruta. A zona do ría préstase para un baño, sendo a época.
O percorrido vai no sentido horario para comezar cun bo aperitivo que é todo o entorno de paisaxe, arquitectura (outros intereses para quen os teña), arte e historia deste enclave. Por outra parte, así sóbese o desnivel dun modo progresivo e ándase o importante desnivel final en baixada.
Logo do santuario, capelas, aldea das Ermidas e cemiterio do Cruceiro a ruta segue cara Santa Cruz. Aquí non hai que perder o miradoiro apropiado pola Iglesia (coma tantos e tantos lugares significativos) cunha grande cruz. A subida está indicada e "ornamentada" cunha profusión de elementos kitch (haberá a quen lle guste, claro). As vistas dende este promontorio son espectaculares. Dende aquí xa vemos a torre do castelo do Bolo que é cara onde non dirixiremos a seguir. A baixada cara a aldea vai a valmonte polo que, sobre todo se está mal tempo, é preferible baixar polo mesmo sitio. Non se perde nada especial, só que non será circular... O percorrido ata O Bolo vai por unha boa pista de terra.
Na capitalidade municipal nova dose de arquitectura grande: casonas e castelo conviven con construcións máis comúns dun xeito bastante harmónico. Se se quere visitar o interior do castelo, hai alí mesmo unha oficina de turismo pero pecha ás dúas. Sería ben preguntar no Concello se está aberta en cada data.
A baixada de retorno fíxose por medio de fincas e camiños actualmente pechados de matogueira intransitábel. NON É ACONSELLABLE. Recomendo volver polo camiño de subida ou buscar outra alternativa.
Volvendo atrás ata o regueiro de San Bernabé, dirixímonos cara a aldea de Valbuxán, que tamén ten o seu encanto. Dende antes de chegar a este lugar e ata a estrada N-533 o camiño está pavimentado e tamén o está en parte da baixada final.
O roteiro ten un percorrido bastante aberto polo que non parece indicado para días solleiros ou de temporal. A principal dificultade é o desnivel que ten. Facéndoa neste sentido sóbese de modo bastante progresivo.
En resumo: como queda dito, unha ruta que ofrece vistas lonxincuas, paisaxes espectaculares, historia, arte, arquitectura, cultura e actividade humana de non perder.