Baldaburu, Mendibil eta Urko. Markina (Iruzubietatik) Ermuara ibilbidea

Markinako Iruzubietatik hasi eta Ermuan amaitzen den ibilaldi honek Euskal Herriko 100 mendi zerrendetan agertzen diren hiru mendi lotzen ditu: Baldaburu, Mendibil eta Urko.
Ermuan aparkatu eta Zubiaurre kaleko 38. portale aurrean Bizkaibus-eko A3916 busa hartu (orduero) eta Iruzubietara joan; 20 min. Bus geltokitik hasi eta lehenik errepidea gurutzatu behar da ekialdera, errepidetik ikusten ez den bide bat hartzeko; ezkerra ikusten den baserri aldera eramango gaituena. Pista jarraituz, ezkerrera lasterbide bat hartu dut, baina ez du pena merezi, batez ere bustia edo belarra/iratzea luzea badago. Gorago PR markak aurkituko ditugu eta gailurrak igotzeko ezik, beste lekuetan, bide markatuetatik joango gara.
Goi Tentsioko lineara iristean, Pra utzi eta ezkerrera hartuko dugu, linea bezala gutxi gora behera ekialdera jarraitzeko. Gorago, berriz PR-ra aterako gara, baina hau gurutzatu eta aurrean daukagun Baldaburu-ra igo (468m; 1h 10min).
PR-ra jaitsi eta hau jarraitu, orain hego aldera. Iturreta auzotik pasa eta San Kristobal baseliza aurkituko dugu bideti gertu. Hurrengo mendiaren gailurra borobila eta berdea dugu, bere eskuin aldetik bira bat emanez igotzen da PR-a ia gailurreraino. Ez dago galtzeko arriskurik. Mendibil (610m; 2h 40min). Berriz, itzuli bide markatura eta Olamendi gaina pasa eta jaitsieran, eskuinera beste lasterbide bat hartu dut, baina honek ere ez du pena merezi, oso terreno ixi eta malkartsua delako.
Hurrengo bi gainak, eskuinera utziz, lepo batera aterako gara, pista ugarirekin; ezkerrera goraka doana hartu. Ezkerrera bira bat egin ondoren bizkar batera aterako gara: Gipuzkoa eta Bizkaia arteko mugatik gertu igotzen jarraituko dugu. Aurrean daukagun Muindo gainetik pasa daiteke, baina igoera eta jaitsiera ere nahiko itxita aurkitu ditut eta bere magalean doan bidetik jarraitu dut. Bidea estua baina oso erabilia da eta aurrean daukagun Urko-ra eramango gaitu. (793m; 4h 25min).
Hegoaldera jaisten joango gara; puntu horiak daude. Behean ezkerra Eibar eta eskuinera Ermua ikusten dira; bien arteko mugatik gertu jaitsiko gara. Elorreta baserrira ateratzean, errepidez jarraituko dugu, Ermuara iritsi arte.