Beizama (Santa Ageda) - Urraki - Illaun - Santa Ageda

Bidaiari-LO erabiltzaileak orri hauetan utzitako Track-a erabiliz eginiko txangoa (https://eu.wikiloc.com/ibilbide-senderismo/gipuzkoa-beizama-santa-ageda-urraki-illaun-11051561).
Beizama eta Bidania-Goiatz arteko errepidean dagoen Santa Ageda auzoan (eta errepide mendatea - 700 mtro.) kotxea utzita abiatu gara, hasieran GR baten markak jarraituz eta geroago ondo markatutako bideari segituta. Inolako aldaparik gabe pare bat kilometro egin ondoren bidegurutze bat aurkituko dugu eta bertan bidea utzita eta hezia pasatuz ezkerretara goraka doan larretxo bat hartuko dugu (aldapa gehiegirik gabe). Laister baso batean sartuko gara eta aldapa arin bat igoaz laister helduko gara Urraki mendi tontorrera. Buzoia pinudian sartuta dago eta honen kanpotik "Vértice Geodésico" delakoa ikusiko dugu.
Aurretik komentatu dugun bidegurutzeraino bide berdinetik jaitsiko gara eta ekarri gaituen bidea baino ezkerrerago doana hartuko dugu orain. Bide horretatik 500 bat metro egin ondoren, eskubira hartzen duen bidexka bat hartuko dugu eta orain bai aldapa gogorragoa aurkituko dugu Illaun mendiaren tontorreraino. Borda txiki bat inguratu ondoren elektrizitate kableak daramaten posteak izango ditugu erreferentzi eta laister gailurrean dagoen gurutzea ikusiko dugu.
Gailurretik ikusmira zoragarria dago. Guk laino gutxi izan dugu eta erraz ikusi Ernio (bertan), Aiako Harriak, Txindoki eta Aralar, Aizkorri eta Aloñako mendizerra, Udalaitz, Anboto eta atzerago Gorbeia, Izarraitz.... benetan ikusgarria.
Tontorretik jaisteko zuzen doan bidexka bat hartzen da, baina hau bukatzen den tokian lokatza asko zegoela eta, larre batzuk gurutzaturik hau ekidin dugu.
Umeekin egin dugu txangoa, inolako zailtasunik gabe baina esan bezala aurreko egunetan euria egin izan badu bidea oso lokaztuta egoten da eta leku batzutan bidearen kanpotik aurkitu behar izan dugu nondik pasa.