Burretxegaina-Marua-Atxarre-Ogoño. Ibarrangelu herritik zirkularra

Ibilbidea Ibarrangelun hasi eta bukatzen da. Euskal Herriko 100 gailurren zerrendetan agertzen diren lau gailur lotzen dira.
Herriko eleiza aldamenean dagoen aparkalekuan abiatu eta beherantz egingo ditugu lehen pausuak, frontoiaren aldamenetik pasa (hemen ere utzi daiteke autoa) eta mendebalderantz joko dugu, lehen aldapa gogorra igoaz.
Behin goiko aldera aterata, aurrez aurre ikusiko dugu Burretxegaina, zuhaitzez estalia; bertara iristeko pista zabala hartu ezkerrera eta ia lepora iristean pista utzi eta bidezidor hestu bat hartu eta igotzen jarraituko dugu; ez dago galtzeko arriskurik: bide guztia apatxetaz gain pinturaz josia dago; terrenoa oso karstikoa da eta zenbait lekutan eskuak ere erabiliko ditugu; honetaz gain landaredia ugaria da eta zenbaitetan lianekin trabatuko gara. Buzoira iritsi eta ez dago bistarik. (402m; 1h08min). Bide berdinetik itzuli.
Iruzkieta etxera iristean, errepidez jarraitzen da, Garteiz etxadira heldu arte; hemen, etxe tartetik pasa eta pista jarraituz, GR eta PR bezala markatutako bidera aterako gara; berehala, desbideratuko gara ezkerrera bigarren gailurra egiteko; honek ere bidexka hestua du, gehiegi ere pintatua, baina aurrekoak baino karst gutxiago dauka. Marua (347m; 2h35min); honek ere zuhaitz asko du, baina Urdaibaiko bista bat badu.
Berriro jaitsi GR/PR bidera eta jarraitu. Bidegurutzera heltzean, zuzen doan pista hartu (PR) eta bide zabaletik helduko gara: Atxarre (312m; 3h20min). Honek bai, bista ederrak ditu itsasadarra eta Mundaka aldera; San Pedro baseliza dauka gainean. Itzuli bidegurutzera eta ezkerra jaisten den bidezidorra hartu (pintura gorria). Lehen hilerria eta ondoren Akorda; ez da beharrezkoa bertatik pasatzea, gaineko aldetik daukan bidexkatik laburtu eta iparraldera jaitsiko gara, irabazitako desnibel guztia galduaz; honela, Lagako hondartzara doan errepidera atera eta bere bazterretik doan bidegorritik, errepidean gora egingo dugu; ia kilometro bat egin ondoren, errepidea utzi eta PR/GR bidea hartu, gorantz.
Elantxobeko hilerria ezkerrera utziz, PRan jarraitu, Orain seinale ugari daude Ogoñorarte (PRa bertaraino). Ogoño (305m; 5h); honek ere goiko aldean tramo karstikoa du.
Hilerriraino itzuli eta orain, errepidez, GR/PR bidea jarraituz, itzuliko gara Ibarrangelura.