Cabo Home e Fachos de Donón e Hío

Ruta que une os lugares máis típicos da Costa da Vela: O cabo Home, os Fachos de Hío e o de Donón (Monte do Facho) e as praias de Melide e Barra, practicamente sen asfalto.

Utilicei como base dúas rutas de wikiloc: Sendero entre fachos e Praia de Barra-monte facho. Asímesmo esta ruta ten sinais de dous sendeiros, azuis e branquivermellas, inda que non sei os seus nomes.

A ruta parte do párking de Donón cara ao extremo do cabo Home, visita os faros de Cabo Home, Punta Robaleira e Punta Subrido e a praia de Melide. Todo este tramo temos as Illas Cíes á vista. Desde o último faro, primeiro por pista e logo por un camiño en baixada, vaise ata a praia de Barra. Logo de camiñar por ela, deixámola e saímos ao parking e o abandonamos pola esquerda ata enlazar cun camiño que chega ata unha pequena ponte de pedra sobre un regato. A ponte non hai que cruzala senón deixala á esquerda e a ruta comeza a subir en dirección a Hío. O camiño polo que se fai o ascenso está empedrado e une Hío e Donón. Crúzase a estrada e continúa o ascenso ata que se deixa este camiño no alto para xirar á esquerda e un pouco máis adiante desviarse para subir ao Facho de Hío. Hai un vértice xeodésico no cumio e as vistas das rías de Vigo e Pontevedra son impresionantes.

Baixamos de novo ao camiño e séguese á esquerda por pistas ata o Monte do Facho de Donón, un lugar de moito interese.
Podemos ver no cumio unha garita de vixiancia do século XVII que formaba parte dunha rede distribuída por toda a costa de Galicia para avisar mediante o lume da presenza de piratas e outros perigos.
Moito máis importante é o xacemento castrexo parcialmente excavado que hai na parte este. Xa deshabitado en época romana, o lugar pasou a ser un lugar de peregrinación e culto ao deus Berobreo, e así atopáronse alí unhas 180 aras votivas. Outras fontes opinan que Berobreo fai referencia ao nome do poboado: Berobriga.

Desde aquí, e logo de disfrutar das vistas, báixase 1 km ata o pobo de Donón onde iniciamos a ruta.

Feita en decembro de 2012 por Lucía e Jose.