Celanova. Circular a Castromao

Percorrido pola contorna de Celanova con especial interese no castro de Castromao. Este poboado estivo habitado durante uns mil anos entre o século VI antes e o III despois da era común. Ten unha importante superficie (20.000 metros cadrados) e só está parcialmente escavado. Destacados achados son a figura dun simio, un tríscele calado, un forno portátil... Domina unha ampra panorámica sobre a conca do Arnoia, Celanova, Vilanova...
Ademais deste centro de interese, atoparemos algunha aldea, capelas e sobre todo panorámicas dun amplo territorio.
A ruta non está sinalizada e foi feita seguindo esta de davidexordos: https://gl.wikiloc.com/rutas-outdoor/roteiro-polo-bosque-de-celanova-3641712
Dicir que o paso atópase cortado en zonas de explotación gandeira, na parte alta, entre as aldeas de Ermide, O Casal, Amorociña (por situarse, que non teño claro a cal poida pertencer o territorio). Está sinalizado nos waypoints os puntos onde existen pechamentos que cortan o paso (non son portelas que se poidan abrir, son pechamentos fixos). Nestes puntos houbo que saltar os valos para poder continuar, con exposición ás ameazas (sospeitosas de conflito) dos propietarios. Nalgún caso parece sospeitoso de apropiación de terreos ou camiños públicos... En todo caso, NON PARECE RECOMENDABLE FACER A RUTA POR AQUÍ. É unha mágoa porque o percorrido é atractivo e os camiños están limpos.
Unha vez pasada a zona de pastos e gando, torcemos cara a esquerda para comezar o retorno. Nesta parte desviámonos para visitar "casa da neve" ou neveira do mosteiro de Celanova, pero dela non queda senón o nome do monte...
dende este punto só queda ir descendendo cara ao punto de inicio. A certa altura coincidimos co Camiño Natural que dende Portela do Home vén ata Ourense
En resumo, unha ruta interesante pero inutilizada polo pechamento de certos tramos. Unha mágoa.