Cepudo - Chandebrito - Outeiro Grande - Alba - Cepudo

Unha ruta fermosa polas vistas que podemos contemplar tanto dende o Cepudo ou o Alba, como dende o castro de Chandebrito ou o Outeiro Grande.

Saímos do merendeiro do monte Cepudo pola GR53.1, variante da GR53 coa que conflúe ao pouco. Continuamos por esta, deixándoa de vez en cando para evitarmos o asfalto sempre que podemos. Saímos de novo a ela á altura do muíño de Chans, que ten unha levada moi bonita, e ascendemos o castro de Chandebrito.

Deixamos o castro e atravesamos Chandebrito saíndo polo barrio das Tomadas en dirección ao colexio Estudio. Pouco despois do colexio chegamos a un cruzamento e, continuando de fronte, no segundo desvío á esquerda deixamos a GR53 e aproveitamos durante un anaco o antigo PR-G 60 (circular de Priegue) para desviarnos ao pouco á dereita e afrontar a única subida forte da ruta (forte pero moi curta). Hai que estar algo atentos para non pasar de longo este desvío que nos leva ao Outeiro Grande: a vexetación cubriu xa case totalmente o que era un amplo cortalumes e no cumio, en tempos limpo e despexado, para acceder a caseta percíbese ben un camiño á esquerda, pero para dar co vértice xeodésico hai que atravesar a vexetación onde se percibe un penedo (á dereita), mesmo pelexando con algunhas silvas.

Dende a caseta temos un panorama impresionante sobre o Val Miñor, dende o Galiñeiro até o cabo Silleiro. Dende o vértice xeodésico é fabulosa a vista sobre Vigo, a ría, as Cíes e Ons, e cara ao interior o Galleiro e até o Faro de Avión.

A partir de aquí temos un anaco no que recomendamos mapa ou gps para non trabucármonos nalgún dos moitos cruzamentos até dar coa baixada cara ao rego no que atopamos o panel informativo da fraga de Rodas (que ben merece unha visita). A partir de aquí, ascensión suave ata a ermida do monte Alba.

A partir do quilómetro nove a ruta pode facerse coincidir co PR-G 9 (Alba-Outeiros), dende o momento en que pisamos asfalto. Mais nalgúns tramos podemos cruzar por camiños para evitalo. De todos os xeitos, un quilómetro máis de asfalto semella ineludíbel se queremos acadar o cumio do monte Alba sen pasar de novo polo Cepudo.

As vistas dende o monte Alba son as máis completas sobre a cidade de Vigo e sobre a ría. Albíscanse tamén as praias de Nigrán e a serra da Groba, por unha banda, e mesmo Ons e a Barbanza.