Circular pola Serra do Cando

A Serra do Cando, en opinión de Galipedia é unha serra galega pertencente á Cordilleira dorsal galega que ten montes a unha altura media de entre 600 e 1.000 metros sobre o nivel do mar. Esténdese polos concellos de Cerdedo, Cotobade, Forcarei, A Lama e Beariz. Está unida á serra de Candán polos montes de Costoia.
A vexetación da serra son as xestas, o mato de toxos, breixos e carqueixas. Hai importante plantacións de piñeiro e eucalipto. Existe un ecosistema de gran valor nos altos da serra, así como nas carballeiras do río Verdugo e os seus afluentes.
Recibiu a distinción de Zona de Especial Protección dos Valores Naturais.
A ruta de hoxe facémola polos concellos de Cerdedo e Cotobade. Iniciámola e rematámola no lugar de Caroi. Dende a aldea de Cima de Vila ata a de Carballás, preto de Cerdedo, onde almorzamos no restaurante Comareiro, percorremos todo este treito polos montes da serra, chegando a alcanzar unha altitude preto dos 1,000 metros. Pola tarde, facemos un anaco polo PRG 69 (Frei Martín Sarmiento) agora descatalogado, continuando de novo polo monte ata chegar o punto de inicio.

A nosa recomendación é que esta ruta se faga nun día que non choiva tanto como o que nos tocou a nós este luns. As rachas de vento, xunto coa choiva, a veces moi forte, outras veces de sarabia e de frío intenso, fixeron que chegáramos totalmente mollados dende a cabeza os pés. A vantaxe de que fora así, tivémola en poder observar a cantidade de fervenzas que encontramos. A desvantaxe foi que, tódolos camiños polos que pasamos estaban encharcados de auga, que mais ben parecían regatos; e que a néboa que tivemos durante a mañá, no nos permitira ver as que, supoñemos sexan, boas vistas do val.

Encontramos algo de asfalto, principalmente na zona alta, onde se encontra o parque eólico, e tamén, loxicamente cando pasamos polos pobos que temos que cruzar; o resto facémolo por pistas forestais, camiños por fragas enchidas de carballos, algúns deles moi antigos e outros, por sorte, moi recentes.