Circular polo Camiño da Raíña (A Cañiza)

Este percorrido non sinalizado componse de dous treitos diferenciados, que uniremos para obter un sendeiro circular.
A primeira parte da nosa andaina será polas abas dos montes da Paradanta, onde nacen o regato das Bouzas, rego do Porto do Chan e regato de Barreiro. Saímos desde a aldea de Formigueiro, moi preto do santuario d´A Franqueira e de aquí imos a Visticovo e logo seguimos por unha corredoira que acompaña ao rego das Bouzas e gañando altura acadamos o nacedeiro deste regato no coto Xabriña.
Continuando paralelos a curva de nivel chegaremos a un punto con boas vistas sobre A Cañiza. Agora baixamos cara ao núcleo de O Forroño, pasamos por debaixo da autovía e situámonos no santuario da Pena de Francia. Aquí tendes unha capela do ano 1756 nunha contorna con abondosa arboreda e mesas para tomar un acougo. Espéranos Ferredo e Custeiras e xa dá comezo o treito polo Camiño da Raíña.
A raíña era dona Urraca, que usaba este camiño cando viña desde Castela ata o mosteiro d´A Franqueira. Lemos no cartaz da ruta:
"Antiquísimo camiño e vía principal de comunicación, polo que desde a Idade Media transcorreron día a día carruaxes, comerciantes, arrieiros e mensaxeiros... e aínda a principios do pasado século baixaban a ombreiros os cadaleitos desde os lugares de Formigueiro, Vilariño e Folgoso ata Parada de Achas, denominándose tamén Camiño dos Defuntos".
Nós non remataremos n´A Franqueira, senón un pouco antes, en Formigueiros, de onde partimos e contemplando polo camiño o fermoso bosque caducifolio que hai no val do río Calvo.