Circular rio Loña no Pereiro de Aguiar

Esta ruta, amena e sen excesiva complicación, coincide en parte coa "Ruta dos Muíños" que transcorre a carón do río Loña, no concello do Pereiro de Aguiar. Ademais ten uns treitos por carballeiras e aldeas dos arredores. Foi feita seguindo esta: https://gl.wikiloc.com/rutas-sendeirismo/carballeiras-e-bosques-de-galeria-do-lona-38095782
Comeza a carón da (espantosa) urbanización Veiga de Abaixo, onde hai lugar abondo para estacionar. Tén unha parte de subida cara Cima de Vila, onde podemos ver un interesante conxunto dunha capeliña, un cabaceiro e unhas casas de boa factura.
Descéndese cara Boeiros e axiña se chega a carón do Loña que acompañaremos en doce subida por unha beiras despexadas. De camiño atopamos varios muíños que no seu tempo foron importantes e hoxe ou están xa na ruína total ou nun estado de abandono (e vandalización) triste.
En chegando ao cruce coa estrada OU-0510, deixamos o río para (pasando a carón do campo de fútbol de Loñoá) ir á aldea de Cebreiros na que podemos observar tamén un fermoso conxunto rural, aínda non na ruína total...
Continuando polo medio de touzas e algún prado, chegamos outra vez ao río, que cruzaremos para seguilo a favor da corrente ata chegar a carón da urbanización de partida. Subimos xa atravesándoa, mais pola súa parte inferior chegariamos a unha área de lecer.
Case na súa totalidade, transcorre por camiños, sendeiros e pistas; ben despexadas e con abondosa cobertura arbórea. Non hai moito problema de zonas lagoeiras. A senda do río está desbrozada.
En resumo: sen ser espectacular (na miña opinión), é unha ruta interesante (paisaxe, aldeas, muíños, pontellas, o río, carballeiras...) de doado acceso, e cercana para a zona de Ourense capital. Recomendable para persoas cunha forma física "normaliña". Pódese facer en calquera época do ano (se cadra non con grandes cheas!).