Codeseda - Montillón en A Estrada

Ruta feita co grupo “os luns ao sol” de Sendereando.es

Iniciámola no lugar de Abragán, parroquia de Codeseda. Uns metros mais abaixo desviámonos para percorrer uns tres quilómetros pola beira esquerda do río Umia ao seu paso polo lugar.

Desviámonos do río na ponte vella de Codeseda para enfilar, agora por asfalto ata o lugar de A Sagrada, onde atopamos unha preciosa carballeira ao lado da igrexa de San Xurxo.

A igrexa de San Xurxo de Codeseda é de ábsida pentagonal con arquivoltas semicirculares tóricas unida á nave mediante un corpo rectangular limitado polo arco triunfal e outro arco paralelo que marca o arranque da porción semicircular.
No lugar existiu o mosteiro de Augas Santas, anterior a 1164. Ao seu carón está a casa reitoral e un cruceiro.
Así figura na Wikipedia-Galipedia.

Despois da visita correspondente, dirixímonos ao lugar de As Quintas para seguir camiñando, esta vez polo monte do mesmo nome que o lugar. Por estes montes pacen tranquilos en compañía, bestas, cabalos e gando vacino.

Nestes montes faise a xuntanza das bestas que serán conducidas ata Sabucedo para facer a famosa “Rapa das Bestas” que se celebra o primeiro domingo do mes de xullo.

Segundo contan, na actualidade existen 14 manadas, mais de 600 unidades entre machos e femias, distribuídas todas elas por unha extensión de mais de 200 quilómetros cadrados de monte.

Ata o cumio de este monte de 715 m de altitude, temos 12 quilómetros de subida, está totalmente pelado, cheo de toxos e herba para que se poidan alimentar os animais.

Agora toca baixada ata Montillón de Arriba, onde se atopa o bar “Casa Verdura”, onde nos espera un suculento cocido, acompañado dunhas non menos estupendas sobremesas composta de filloas, mel, queixo de tetilla con marmelo.

Esto que xantamos era necesario para repoñer as forzas gastadas durante a camiñada da mañá e tamén a subida que nos espera ata chegar ao inicio de esta interesante ruta.

A maior parte do percorrido realizámolo pola recente ruta en proceso de homologación como “PRG 197 Codeseda Rapa das Bestas” deseñada, rozada e sinalizada por Codeseda Viva. O resto do traxecto debuxado en BaseCamp, transcorre por mais asfalto do desexado, tanto a chegada a Montillón como a saída, aínda que son estradas secundarias que non teñen apenas tráfico.

Tempo en movemento cinco horas cincuenta e tres minutos, con unha media de 3,8 quilómetros hora.