Costa ártabra

Exixente e duro roteiro que vai dende o miradoiro de Purrido até a Garita de Vixía Herbeira e volta por Santo André de Teixido. A pesar da presenza no primeiro tramo dalgún eucaliptal, a inmensidade do océano e dos cantís acapara toda a atención, con varios puntos de alto interese paisaxístico (increíble son as vistas dende o Alto de Tarroiba coa Garita e Santo André de Teixido ao lonxe).
Poderíamos dicir que o primeiro tramo remata na zona dos miradoiros de Chao do Monte e dos Carrís, dende o cal imos coller un roteiro por pista forestal que vai conducir até as inmediacións da Garita, tendo que recorrer 2 km por asfalto para chegar a ela.
A baixada até Teixido vai ser doada e cómoda, pero é recomendable facela con calma, xa que ao ser por asfalto, os xeonllos sufren e poden chegar doridos.
A idea de pasear por Santo Andrés de Teixido e recobrar forzas é unha gran idea. É unha aldea de gran encanto que conta cunha arquitectura moi singular e onde tamén se poden atopar varios locais de restauración e para mercar recordos. Se hai sorte, paga a pena entrar na igrexa.
O camiño de volta proposto no mapa até os miradoiros ten marxe de mellora. Sería bastante máis interesante coller o tramo do camiño medieval que vai dende Teixido e que ten 1,1 km de lonxitude, no canto de dar unha volta aburrida e máis longa (3 km, segundo a gravación) polo asfalto como así foi (erro na planificación previa do roteiro por non caer nesta opción).
O ascenso ao cume do Alto de Tarroiba convén facelo amodiño e tamén descansar uns minutos e desfrutar das vistas no alto, porque as forzas chegan xustas e hai que reservar as derradeiras para a ida e volta ao faro de Punta Candieira (opcional, porque o faro moito encanto non é que teña, a verdade).