Deba-Zumaia Flyscharen ibilbidetik

Deba eta Zumaia arteko ibilbide hau, Hondarribitik Mutrikuko Saturraran hondartzaraino doan mendi Ibilbide Luzearen (GR-121 Talaiaren ibilbidea) 5. etapa ere bada. Garai bateko baleazaleek, baleak zelatatzeko erabiltzen zituzten talaietatik zehar doa eta, hortik izena.

Ibilbidearen hasiera Debako tren geltokian dago. Bertatik, udaletxera joan gara eta maldan gora doan bidetik, San Roke ermitara. Ondoren, Santa Katalina ermitara iritsi gara, N-634 errepide gainetik pasatzen den egurrezko zubitik pasa gara eta araztegia gure eskuinean utziz, Itxaspeko behatokira iritsi gara.

Jarraian, garai batean trenak egiten zuen bidea erabili dugu, baita tunel batetik pasa ere, Mendatagainera iritsi aurretik. Bertako ikuspegiaz gozatu ondoren, ibilbideko 5,4 km-an dagoen “Soka” izena duen bidepunturaino joan gara eta kokapen honetan bi aukera har daitezke:

1) Soka dagoen malda handiko bidezidorretik Mendata hondartzara jaitsi eta Flyscharen gainetik hondartza zeharkatzea. Honetarako, batetik, zola sendoa duten oinetakoak erabiltzea gomendatzen da, Flyschek ertz zorrotzak baitituzte, eta bestetik, itsas-behera izatea beharrezkoa da (Debako itsas-mareen ordutegiak deskribapen honen amaieran dagoen lotura erabiliz ikus ditzakezu).
2) Soka duen malda handiko bidezidorra hartu gabe, itsaslabarraren aldamenetik garbi markatutako bidea jarraitzea.

Aurreko bi aukeretatik, ibilbide honetan lehenengoa egin dugu. Bigarren aukera hartuz gero, ibilbideko 6,2 km-an dagoen “Sakonetako hondartza” izena duen bidepuntuan bat egingo genuke.

Ondoren Portutxikira joan gara, handik Elorriaga auzora, bertan dagoen atseden-lekura eta behatokira; baratzazarrak eta Flyscharen sorrerari buruzko argibideak ikustera.

Segidan, mendi eta baserri girotik barrena, Zumaiako Algorrira iritsi gara, bertako paisaia ikusgarria, San Telmo ermita eta Itzurun hondartza ikusteko.

Azkenik, Zumaia zeharkatu dugu bertako tren geltokian ibilbide eder honi amaiera emateko.

Debako itsas-mareen ordutegiak: