Dozola eta Argaraieta. Fago herritik zirkularra

Bi mendi hauek, Euskal Herriko 100 mendi zerrendetan agertzen dira; ibilbideak biak kateatzen ditu Fago herritik eta bukatuta. Hasieran eta bukaeran pistaz guztira 2km gehienez egingo ditugu; gainerako guztia bide estuetatik egiten da.
Herritik, errepidez iparraldera hartu eta aurrean daukagu San Kristobal baseliza; bertara igotzeko, ezkerrera doan pista hartu eta gorago eskuinera eginaz iritsiko gara. Hemendik gora, markatuta dagoen bidezidor estua hartuko dugu, iparraldera doana. Repatauda eta Marianico lepo belartsuak pasa eta irabazitako altuera zertxobait galdu beharra dago; Matamachos mendatetik datorren bidezidorrera aterako gara; bidezidor hau mendebaldera doa eta Dozola-rako seinalea ere bertan dago; beraz, hemen, ezkerrera hartuko dugu; Nafarroa eta Huesca arteko mugatik (Garde/Fago) gertu ibiliko gara Argaraietara iritsi arte.
Dozola mendiak harkaitza handi bat du gainean; bidean dauden apatxetak, bertara iristean, bukatu egiten dira eta paretan katuka igo beharra dago, pasabide errazenak bilatuz. Dozola, (1.402m; 2h 25min).
Gainez-gain, bide garbirik gabe hasieran mendebaldera jaisten joango gara; ondoren hegoaldera bira eman eta pareta bat jaitsiko dugu; helduleku onak daude. Mugaren lerroa jarraituz, bide argirik gabe eta ezpel artean, hegoaldera jarraituko dugu. Beherago bidexka garbiago dago.
Argaraieta aurrez-aurre daukagunean, ezkerretik bira handi bat eman eta atzetik igoko dugu. Bidezidorra argia da ia denbora guztian; GR15-ean amaitzen da. Bertara iristean, eskuinera hartu eta markak jarraituz goraino eramango gaitu. Bidean kobazulo handi bat ikusiko dugu goitik; gorago, ia lepora ateratzean, eskuinera eramango gaitu. Lehenik, “Muga de las tres cruces”: Zaragoza, Huesca eta Nafarroa elkartzen diren puntua; (ez muga eta gurutze arrastorik ere ez), tontorra eta berehala Argaraieta, (1.267m; 4h 30 min).
Argaraietan, erpin geodesikoaren gain, GR-15 ibilbidearen kartel bitxia dago: hemen hasten da GR-15 eta El Pont de Suert-en amaitu.
Herrirako jaitsiera oso erraza da, GR-15 jarraitu. Fagora inguratzean pistaz egingo ditugu azkeneko 1,5km-ak