El Collaín. [Rede de Rutas Saludables Santu Adrianu]

Ruta senderista que, dende Tenebreo, baxa pel camín vieyu hasta Valdolayés, pa subir al castru d'El Collaín y volver a través de la viesca pa Tenebreo.

Ruta circular
Distancia: 3km
Desnivel acumuláu: 150m
Destacaos: Castru d'El Collaín, viesca atlántica

Al pie de Valdolayés y dominando la veiga del Trubia ente Villanueva y Tuñón, asítiase'l castru El Collaín, lo que pudo ser un recintu fortificáu de reducíu tamañu con funciones d'observación o defensives. Podemos observar los resto esbarrumbaos de les muries mientras atisbamos el valle ente la vexetación que lu cubre hoi día.

La ruta empieza en Tenebreo, avanzando en paralelu a la carretera pel camín vieyu, de traza ancha y buen pisu, descendiendo cómodamente mientres apreciamos los distintos tipos de vexetación. Na parte final de la baxada llegamos al depósitu del agua, que pasamos de llargu, y xiramos a la izquierda arriba nel cruce col camín de Valdolayés.

Ganamos altura, probablemente pisando barru, nesti tramu que conecta y fai circular la ruta de Las Xanas, pero nun vamos dir tan allá esta vez, pues cuando algamemos la zona con una gran paré de caliza, vamos tomar el camín de la izquierda p'averanos a El Collaín.

Xunto a una torreta d'alta tensión, intuiremos a la vera'l camín el senderu o senderos que nos llevan a la profundidá del castru, pobláu d'ancinas. Equí podrémos dar con alguna vista sobre Villanueva y tamién pa la parte de Tuñón.

De vuelta pel mesmu senderu al camín, continuamos l'andada ensin grandes desniveles a través de la viesca. Llegáu el momentu, apaeznos al izquierda un desvíu que vamos tomar pa baxar per unes revueltes que dan a una zona mui húmeda per onde cruza un regueiru, que salvamos per un llau pa siguir el buen camín que nos lleva de vuelta a Tenebreo.