El Pozu l'Oru. [Rede de Rutas Saludables Santu Adrianu]

Ruta senderista que, dende Llavares, sube pel camín d'El Trave El Cardiellu, pa entrar nel conceyu vecín de Morcín y volver al altu d'El Pozu l'Oru, volviendo a Llavares pel camín d'El Mesáu.

Ruta circular
Distancia: 6km
Desnivel acumuláu: 300m
Destacaos: Castañéu, vista a L'Aramo.

La ruta empieza en Llavares, na plaza xunto al llavaderu, caminando pel pueblu en dirección a la veiga, onde vamos garrar la primer entrada a la derecha, pa subir contra una nave ganadera.

Una buena caleya ancha y de buen firme, dende la que divisamos el llugar de Cuatumonteros, acércanos a una portiella que da pasu a un bebederu y al firme del camín vieyu, pel qu'ascendemos sobre grandes bloques de piedra bien asentaos al tarrén, continuando pela traza principal cuando vemos algún desvíu menor pa ún y otru llau.

Depués de dar unas revueltas dexamos la traza del camín d'El Trave pa siguir el senderu monte arriba hasta dar de vuelta cola traza ancha del camín, xusto a la verda d'un guapu castañéu a mano izquierda, buen sitiu pa facer una posa y contemplar los vieyos exemplares con calma.

De vuelta a la ruta, avanzamos pela traza del camín en paralelu a la traza marcada pela finca a la nuestra izquierda durante unos metros, con atención pa, ente mata de cotolla, tomar el senderu que entra a la nuestra derecha, qu'enseguida abre y nos da vista sobre La Cardosa, enfrente, sitiu aprovecháu polas cabras. enseguida esti senderu va dar col camín que nos sube, yá a la vista, al colláu d'El Cardiellu, onde vamos poder atisbar Los Picos d'Europa, Peñamayor, El Monsacro...

De vuelta a l'andada, sin danos cuenta vamos entrar al conceyu Morcín, mientras baxamos pa La Cotina, pueblu que vamos pasar, xirando a la derecha, nada más que pol barriu d'El Navalón pa tomar camín de buena traza y cómodu andar hasta volver al nuestru conceyu de Santu Adrianu nel colláu d'El Pozu l'Oru.

Ellí vamos cruzar de frente la pista aformigonada, que nos baxaría de frente al final de la ruta en Llavares, pa baxar per buen camín que pasa penriba la fonte El Pedregal y dende'l que vemos per baxo nuestro el picu El Mesáu, contra'l que nos vamos desviar per sendru a la derecha pa bordealu y baxar, agora sí, a la pista aformigonada que nos lleva de vuelta a Llavares.