Gaintza- Urtsumendi-Altzagamendi- Astoeta-Gaintza

Gaintza inguruko mendiak egiteko aukerazko ibilbide bat.

Lehenik, Larraitz aldera dauden bi tontorrak egin ditut: Eizmendigaina eta Urtsumendi. Ibilbide zati handiena errepidetik egiten da.

Berriro Gaintzara itzulita, bigarren zatiari ekin diot, Baliarrain eta Legorreta aldera dauden tontorrak: Goikogaina, Gaztaintxoeta, Gaintzagaina, Altzagamendi eta Astoetagaina.

Gaintzatik ateratakoan, Errementaritxiki etxea pasa orduko, eskuinera gora abiatzen den gurdibidea hartu dut eta utzi gabe aurrera jarraitu dut Goikogaina mendira iritsi arte.

Bueltatu naiz berriro Gaintza aldera eta langa bat igaro orduko gora jo dut pasabide bat topatu arte. Hura igaro eta ur-depositua igaro ordurako eskuinera gora doan gurdibidea jarraitu dut. Gaztaintxoeta tontorrean poste geodesiko bat dugu. Bidean aurrera jarraitu eta belardira pasa naiz eta langaren kontra joan naiz pistara aterako gaituen atakarekin topo egin arte.

Pistan aurrera egin dut eta nahiko zikina zegoen baina ibiltzeko arazorik ez duen bidezidorretik Gaintzagainera iritsi naiz.

Berriro pista eskuratu eta bertatik jarraitu dut Altzagamendira eramango gaituen bidegurutzeraino.

Bidegurutzean erdiko gurdibidea jarraitu dut tontorrera iritsi arte. Bertan puskatuta dagoen poste geodesikoa dago. Berriro gurdibidea hartu eta beherantz zuzen jarraitu dut, errebuelta itxi batean eskuin aldera abiatzen den bidezidorretik joan naizelarik.

Beheko erreka-zulora iristen garenean iturri bat aurkituko dugu. Pista jarraituta Abalizelaiagoikoa baserrira iritsiko gara eta handik Abaligoena baserrira. Mapan puntu honetatik bidezidor bat ateratzen den arren, terreno guztian zekale sail bat zegoenez, bide alternatibo batetik iritsi naiz Astoetagaina tontorrera: errepidean behera jaitsi naiz errebuelta itxi bat arte eta bertatik gora mendia atzetik inguratuz.

Berriro Gaintzara bueltatzeko bideari ekin diot. Errepidean gora joango gara merenderoan bukatzen den tokiraino. Han, San Juan iturria eta garbitokia ditugu eta bertatik Gaintzaraino eramango gaituen pista abiatzen da.

Nik tartean zegoen tontor bat ere igo det, baina beheko pistara iritsitakoan, hestura itxi batekin topo egin det eta gainetik pasa behar izan dut. Hori egin nahi ez bada, tontorra igo gabe utzi edo, bestela, berriro atzera eginda berreskuratu pista.

Buelta bukatutakoan zertxobait hartu nahi baduzu, "Kale Txiki" jatetxean duzu aukera.