Gazteluaitz-Arburu-Lagarte-Erroizpe, zirkularra Elduaindik

Euskal Herriko 100 mendi zerrendan dagoen Lagarte mendia egitea da asmo nagusia.
Ibilbide zirkular hau, Elduain herriko behe aldean hasi eta bukatzen da. Autoa aparkatzeko Corenso Tolosana enpresa inguruan lekua aurkituko dugu. Enpresa hau eskuinera utzi eta bide zabalean beheruntz joango gera hego-ekialdera; Elduain erreka gurutzatu eta berehala, ezkerrera doan pista hartu, ekialdera. Ipar aldera ere eramango gaitu eta ondoren lurrezko pista zabal batean, bailararen goialdera aterako gara. Denbora guztian bide zabalean goaz, 680m tara iritsi arte; hemen bide zabala utzi eta zelai bat zeharkatuko dugu hegoaldera igoz.
Goiko hesia pasa eta hesiaren paralelo doan bidexka jarraitu, nahiko sasitsua da.
Aurrerago, Gazteluaitz bistan daukagunean, berriz hesia pasa bidea jarraituz, helduko gara Gazteluaitz edo Mina Txuri (779m).
Bidea jarraitzeko, jaitsi metro batzuk bidexkara eta jarraitu hego-ekialdera; berehala iritsiko gara hurrengora: Arburu (789m).
Itzulera egiteko, aurretik igo dugun zelaiaren goialdera atera behar dugunez, aukera bat da, etorri garen bidetik itzultzea bertaraino, edo, nik egindakoa, Gazteluaitzera hurbildutakoan, hau eskuinera utziz, bidexka sasitsu bat jarraituz, egitea.
Behin, zelaiaren goialdean gaudela, hurrengoa, aldapa igotzean iritxiko gara: Lagarte (811m); honek ez du inongo seinalerik eta oso gain zabala du.
Hurrengoa bistan daukagu, lepora jaitsi ondoren zuzen zuzen Erroizpera (804m) iritsiko gara.
Bidea jarraitzeko, iparraldera hartu, hasieran bide argirik gabe baina alanbrezko hesira iritsitakoan bidexka garbi azaltzen da. 520m-tan, bideak eskuinera hartzen du eta lehendabizi pistara eta ondoren hormigoizko bidera aterako gaitu; herria bistan daukagunez ez dago azalpen gehiagoren beharrik.