Grandamiana. [Rede de Rutas Saludables Santu Adrianu]

Ruta circular que, dende Castañeo'l Monte, pasa xunto a las antiguas minas de fierro de La Parva pa averase al pueblu de Llinares (Proaza) y subir al puntu más altu del conceyu Santu Adrianu, Grandamiana (811m), faciendo cume depués nel picu Plantón (751m).

Ruta circular
Distancia: 7,5km
Desnivel acumuláu: 400m
Destacaos: Techu de Santu Adrianu, vista panorámica, viesca atlántica.


El conceyu Santu adrianu caracterízase polos grandes contrates de tarrén, dende lo fondero y plano de las veigas del ríu Trubia, a los escarpaos ya inaccesibles cuetos calizos onde casi nun queda más que la presencia humana antigua. Pero en metá de too eso, cuenta con un “techu” del conceyu mui accesible: Grandamiana.

La ruta empieza en Castañeo'l Monte, caminando per asfaltu al barriu los Niseiros pa siguir pel camín que va a las minas de fierro de La Parva, que vamos dexar pa otra ocasión, porque antes de llegar a ellas vamos tomar nel primer cruce el camín que gana altura hasta casi dar cola carretera, que nun vamos llegar a ver porque arriba entramos a la izquierda pa dir pel camín vieyu a Llinares, pueblu al que llegamos depués de pasar alguna portiella que volvemos dexar pesllada y algunos tramos de barru, dependiendo de la época.

En Llinares vamos cruzar el pueblu pa la izquierda pela carretera de vuelta a Castañeo, pa desvianos nel final del pueblu pa la pista que se abre a la nuestra izquierda. Caminamos cómodamente per esta pista que baxa a Sama (Grau) hasta que, pasando una casa, vamos ver a la derecha la entrada a través d'una portiella al monte de Grandamiana.

Cruzando la portiella, nun vamos tener más que siguir el senderu que nos guía pel cantu hasta la cima de Grandamiana, puntu más altu del conceyu Santu Adrianu a 811m sobre'l nivel del mar. Tamos además nun trifiniu, puntu nel que s'axunten tres conceyos: Grau, Proaza y Santu Adrianu. Continuamos l'andada manteniendo'l mesmu rumbu pa enseguida baxar contra la parte derecha buscando'l senderu ente los árboles hasta dar cola alambrada de la finca contigua. Baxamos pel senderu xunto a la finca hasta dar cola caleya que nos lleva, a la derecha pa la carretera y sitiu p'aparcar de La Gallinera. Nesti últimu tramu tenemos que dir con disposición a manchar las botas de barru.

Ye'l momentu de caminar pela carretera abaxo, durante algo menos de 1 kilómetru hasta la fonte Las Fileras. Xusto antes de la fonte vamos entrar pel camín arriba a la izquierda pa encarar la segunda cume de la ruta, El Plantón. Al poco de subir pel senderu vamos dar con una portiella grande a mano derecha, pela que vamos cruzar y, otra vez ensin pérdida, garrar el senderu que nos guía pel cantu'l monte hasta la cima d'El Plantón (751m), onde vamos disfrutar d'una vista buenísima na que vamos perder la vista tan allá como a Los Picos.

Pa la baxada, vamos siguir pel cantu durante unos 200m pa torcer a la derecha siguiendo'l senderu bien pisáu pol ganáu hasta la parte baxo d'El Plantón y d'ehí buscar el trazu ente'l monte, siempre abaxo, hasta la manga ganadera d'El Llanu la Osa. Salimos de la finca abaxo cruciando la portiella y vamos dar a la carretera, que cruzamos y subimos un poquitín pa descubrir la entrada a la izquierda abaxo pal barriu La Mayada, al que ensin llegar a él vamos volver a la izquierda pa baxar pa Castañeo y finalizar la ruta.