Intxorta-Erdella-Santamariñazar-Egoarbitza-Azkonabieta, Elgetatik zirkularra

Ibilbide honek, Euskal Herriko Ehun Mendi zerrendetako 4 mendi lotzen ditu: Intxorta, Erdella, Egoarbitza eta Azkonabieta.

Elgeta herrian hasi eta bukatuko dugu, ibilbide zirkular bat eginez. Elgetako erdigunetik abiatu eta Salbador kaletik hego alderantz joko dugu; GI-2639 errepidera atera eta bertatik pausu batzuek egin ondoren seinalatutako bidetik jarraituko dugu. Asentzio ermitara iritsi eta putzua eskuinera utziz, ibilbidea norabidez aldatuko dugu. Gune osoa gerra zibilean eman ziren borroka eta erresistentziari buruzko oroigarriz beteta dago; merezi du berauei arreta piska bat jartzea.
Lehen utzi dugu errepidea gurutzatu eta Intxortarako bidean gora goaz. Lehenik Intxorta-Txiki edo Gaztelumendi tontorra; aurrerago Intxorta (743m). Pixkanaka, iparraldera goaz eta Elgetako gainera aterako gara; GI-2632 errepidea gurutzatuz, aurrean daukagu San Urbano baseliza; gainean daukan mendira goaz, bide erosoena aukeratuz: Erdella (682m).
Gainez-gain goaz eta hurrengo bi mendiak Santamariñazar izenekoak dira, lehenengoa saihestu, eskuinera utziz, eta bigarrenera goaz, gurutzea eta buzoiak dituena: Santamariñazar (666m).
Bistan daukagun Aixola ur-biltegira jaistera goaz; horretarako, pista ezberdinak hartu behar ditugu eta bira haundi bat ere egin beharra dago. Urtegiko paretaren gainetik pasa eta berehala ekingo diogu gorantzako bideari. 520m-tan, ezkerrera hartu behar den puntuan, bidea sasiak oso itxita zeukanez, bira handi bat egin behar izan nuen Egotxia txabolara iristeko. Behin hona iritsita Egoarbitza gailurra ia bistan dago: eskuin aldeko bidetik igo eta ezker aldetik jaitsi naiz. Egoarbitza (733m).
Orain, pista zabal bati jarraituz Karabieta lekura aterako gara; hemen GI-2639 errepidea gurutzatu eta azkeneko mendiari ekingo diogu; itzuli zirkularra osatuta, berriro puntu honetara aterako gara. Ez dago galtzeko arriskurik, antena bistan dago eta bertara doan errepidez igoko dugu. Azkonabieta (728m).
Ipar-ekialdera jaisten den bidezidor zuzena hartu eta Goi Tentsioko lineara iristean, eskuinera hartu, itzultzeko norabidea errekuperatuz; hasieran pista da, baina berehala, pista utzi eta bidezidor polit bat jarraituz, itzuliko gara Karabietara. Elgeta bistan daukagu eta errepidetik edo oso gertutik, GRa jarraituz, berehala gauden Elgetan.
Ez aukera galdu herrian zehar buelta bat emateko