Jata, Urizarmendi eta Ermua. Bakio herritik Gorlitz herrira trabesia

Ibilbide honek Euskal Herriko 100 mendi zerrendetako hiru lotzen ditu. Bakion hasi eta Gorlitz-en bukatzen denez, autoa Gorlitzen aparkatu eta bi autobus linea hartuz heldu naiz Bakiora, hemen oinez hasteko: A3537 Lineak Gorlitz-etik (Inguru bidea geltokia) Mungiara (Lauaxeta geltokia) eta hemen A3518 linea hartu eta Bakiora (Olaskoetxe geltokia). Beraz, ibilaldiaren arrastoa Bakioko Olaskoetxe bus geltokian hasten da eta Gorlitzeko Inguru bidea geltokian amaitu.
Gorlitzen aparkatzeko kontutan hartu TAO sistema dagoela herri guztian. Hala ere, Errementari kalea hartu eta zabalera handi bat dago aparkatu ahal izateko.
Ia ibilbide guztia kostako GR-123an egiten da. Bakarrik Jata egiteko aterako gara eta ondoren berriro hartu eta ez dugu utziko Gorlitzera iritsi arte.
Lehenik Jatatxiki (edo Iñardi edo Jataiñardi) pasako dugu (555m; 1h35min). Berehala gainez-gain jarraitu eta Jata (600m; 1h 55min). Behin GR-ra itzulita, Urizarmendi igotzerakoan arazotxo bat aurkitu dut: Txatximintegoiko baserrira heldu eta bidea hesi batez itxita dago; markarik ere ez da ikusten. Hesia irekitzeko ez zait erraza iruditu eta etxeari buelta emanez konpondu dut arazoa (…).
Ondoren, Urizarmendi (295m; 3h 45min). Hemendik jaistea tokatzen da Armintza herriraino. Hemen. Badirudi GR-ren adar bat ateratzen dela ezkerrera; kostako bidea jarraitzeko, goiko errotondara atera behar da eta hemendik GR-aren seinaleak jarraitu. Ia Ermua gailurrera iritsi eta, beste adar bat ateratzen da ezkerrera, Gorliz-era doana; ibilbidea laburtu nahi bada, gailurra egin ondoren hona jaitsi eta modu zuzenagoan jaitsiko ginateke. Gailurrean, lehenik, Ermua, erpin geodesikoa, eraikitako babes baten gainean (289m; 5h 12min), 100m aurrerago, Ermua, buzoiak. Gainez gain jarraitzen du bideak eta Farora jaisten da; bidean, Leorrari gaina bisita daiteke. Behin farora jaitsita, errepidez itzuli daiteke herriraino; GR-ak berriz, zati bat errepidez egin ondoren, kostatik gertu eramango gaitu, bidean bi mendixka pasatuz: Kukulu eta Antikera.
Bidexka hondartzara jaisten da eta paseo zabalean aurrera eginda, seinaleak jarraituz helduko gara Gorlitz-eko bus geltokira.