Krabelinatx, Azkonabieta, Galdaramuino, Topinburu. Soraluze herritik zirkularra

Ibilbide honek, Euskal Herriko 100 mendi zerrendetako lau lotzen ditu: Krabelinatx, Azkonabieta, Galdaramuino eta Topinburu. Bidean topatzen diren beste muinoak ere igotzen dira. Soraluze herritik zirkularra.
Eibartik Soraluzera errepidez iristean, lehen zubia hartu ezkerrera eta industrialdean eman diot hasiera. Deba ibaiaren aldamenetik jarraitu; oinezkoen zubia pasa beste aldera eta kalean gora, ibaiaren paralelo jarraitu. Ia herri osoa zeharkatzean, eskuinera gorantz hartu eta Untzueta-goikoa baserrira arte hormigoia izango dugu.
Baserriaren ezkerretik pasa, zakur mordoa eta ataka pare bat gaindituta, pista berdea dago ia goraino. Azkeneko metroak pinuak lurrera erorita daudenez bidea aurkitzen joan behar da. Krabelinatx, (603m; 1h 30min) Gainez-gain jarraitu, jaisten. Berehala topo egingo dugu PR-aren markekin; hauek jarraituz, Gallastegi-Torre baserrira aterako gara; errepidea ezkerrera hartu eta berehala utzi eskuinera. Pista berdea jarraitu eta gainera aterako gara; pista gainez gain jarraitu ondoren, mendia aurrean dugunean, pista utzi eta gailurrera pago landaketan bazterretik, ibiderik gabe igo.
Garbe, (513m; 2h 20min). Pauso batzuek atzera jaitsi eta pago landaketaren mugatik, pistara jaitsi baina ikusten den borda aldera. Borda eskuinera utziz gora doan pistan jarraitu behar da; baso lanak direla eta oso lokaztuta dago eta gorago itxia ere bai.
Aurrean daukagun muinoa Tranku da, baina zuzenean igotzeko biderik ez diot aurkitu; oso sasitsu dago dena; ezkerretik doan pista jarraitu eta bere ipar-mendebaldera iristean, saiatu naiz igotzen; hasieran oso bide garbia baina berehala sasia jaun eta jabe; ezkerreko basotik jarraitu ondoren gainera iristean dena itxita dago eta ez dago gailurraren seinalerik. Ez du pena merezi igotzeak, bistak ere ez ditu onak, Tranku (642m).
Hurrengoa, Azkonabieta, bistan dago, antenaduna. Pistetan jarraituz gerturatuko gara; goi mailako tentsio dorrera iristean, bidezidor batek eramango gaitu gailurrera. Azkonabieta, (724m; 3h 35min). Antenarako Errepidean jaitsi eta segituan hau utzi eta gainez-gain jaitsi bidezidorretik; basoan sartu eta jarraitu bidexka malkartsua, GRa den bide zabalera arte. Hemen GRa jarraitu. Aurrean daukagu hurrengoa, Galdaramuino; honek ere antena bere gainean. Bere iparraldetik igoko dugunez, bira haundi bat emango diogu bide garbiak jarraituz. Behin, bere iparraldean gaudela, igoera bidexkan egiten da. Galdaramuino, (669m; 4h 40min). Aurrera jarraitu antena eskuinera utzita; orain pista zabalean goaz jaisten. Berehala Asurtzamendi daukagu aurrean; ez du interes bereizirik. Pista jarraitu ezkero, zertxobait laburtuko dugu ibilbidea. Asurtzamendi igota edo pistaz jarraituta, Asurtza baserrira aterako gara; hemen, errepidez jarraituko dugu zati bat; GRan gaude berriz.
Beherago errepidea utzi. Nik GR-aren markak jarraitu ditut piska batean, gero eskuinera hartu eta igotzen joateko, aurrean daukagun Topinburura heltzeko. Baina goian alanbre hesi ez eroso bat dago oinezkoentzat pasabiderik gabe. Beraz, hobe da, errepidea utzi ondoren, berehala GRa ere uztea, eskuinera hartu puntu horiak jarraituz eta hesiaren paralelo igotzen joan gailurreraino. Topinburu, (590m; 5h 20min).
Bidezidorra jarraitu. Bide zabalera atera eta puntu horiak jarraitu; hauek ia azkenengo muinora eramango gaituzte. Ilordoko gaina, (541m). Pausu batzuek atzera jaitsi eta bidea jarraitu jaisten. Beherago bista-bistan daukagu borda berritu bat. Hemen saiatu naiz eskuinera hartu eta bide laburrago bat hartzen itzulera egiteko baina, beherago dena itxi egiten da. Beraz, bordan ezkerrera hartu behar da. Bidea luzea da baina, pista San Esteban baselizaraino eta ondoren errepidea Soraluzeraino.