Lampaza ao Furriolo (mural). Concellos de Rairiz de Veiga e A Bola.

Camiñada feita seguindo as indicacións desta excelente ruta de María X. Blanco: https://gl.wikiloc.com/rutas-sendeirismo/circular-dende-lampaza-alto-do-forriolo-mural-do-forriolo-rairiz-de-veiga-a-bola-123571067
Percorrido ameno, acaído para camiñar gozando das fermosas touzas que a natureza vai recuperando debido ao triste abandono das aldeas noutrora ricas e produtivas.
Comeza xunto á igrexa da Lampaza, un edificio soberbio non máis recto sentido da palabra. Podemos comprobar como esta aldea tivo que ser laboriosa e gananciosa tamén polas boas casas antigas que conserva. Paga a pena dar unha voltiña polos seus recantos.
Logo dun pequeno treito por estrada, pasamos perto da aldea de Azoreiros e maís adiante atravesaremos a de Crespos. Aquí tamén hai boas construcións aínda que con bastante ruína.
Uns 300 metros máis adiante de Crespos hai un anaco de ida e volta prescindíbal (é en realidade un erro). Débese atravesar o Regueiro de Crespos para continuar a subida cara a área de descanso que hai a carón da estrada OU-531 (Xinzo a Celanova). Atravésase esta e séguese por entre carballeiras para volve cruzala máis adiante. Aquí pode subirse ata o curuto do Outeiro do Furriolo para gozar de mellores vistas.
Dirixíndose cara a aldea do Furriolo chegamos ata o mural erguido alí no ano 2006. Promovido pola Asociación Arraianos e feito por Xosé Vizoso é unha homenaxe e lembranza (á vez que denuncia) das vítimas da represión crimina,l IMPUNE ata os días de hoxe, da rebelión e terror franquista. O Furriolo foi un lugar de asasinato de multitude de persoas secuestradas (a súa detención era ilegal) e encerradas no Mosteiro de Celanova.
O retorno dende esta emotivo lugar ata o punto de inicio realízase tamén por entre zona arborada ata a entrada da Lampaza.
Todos os camiños están limpos. Non é un itinerario difícil; podería ser feito por case calquera persoa cun mínimo de forma física. Isto queda a criterio de cadaquén.