L'Estoupu. [Rede de Rutas Saludables Santu Adrianu]

Ruta senderista que, dende Tuñón, sube pel camín de La Escrita pela sierra L'Estoupu, pa dar al llugar de Les Carangues, onde toma la carretera llocal hasta dar col desvíu pa descender pel camín vieyu a Tuñón.

Ruta circular
Distancia: 7km
Desnivel acumuláu: 400m
Destacaos: El camín de La Escrita, paisaxe karsticu, ancinares, viesca atlántica.

La caminata empieza xunto a la ilesia prerrománica de Santu Adrianu de Tuñón, entrando pueblu arriba pela cai principal hasta atopar un desvíu per camín a mano izquierda, que nos lleva a cruzar un regueiru y avanzar camín arriba. Nesti momentu vamos ver como se pierde'l trazu orixinal del camín, teniendo qu'entrar prau arriba, con cuidáu de dexar los cierres como taban, pa dir oriellaos hasta dar cola salida de vuelta al camín.

Avanzamos pel estrechu camín que se va abriendo pasu pente la peña pa enseguida ganar altura bastante pa apreciar guapes vistes sobre el valle del Trubia. Al fondu vemos vemos la Peña La Escalera, que nos marca'l rumbu a siguir y a la que nos aprosimamos depués d'un tramu pindiu nel que pisamos la mesma roca viva. Con La Escalera yá a los nuestros pies, cambiamos de rumbu xirando a la derecha pa continuar l'ascensión pente monte baxu y menor desnivel hasta dar con una campera atravesada por un tendíu eléctricu.

Cruzamos pel valle que se abre baxo la llínia, rodeando la primer torreta pa depués siguir comodamente'l camín per pista verde. Equí vamos poder apreciar la diferencia de paisaxe ente la vertiente a la nuestra izquierda, que da al Sur y ta poblada d'árguma y arcina, y la que da al Norte a la nuestra derecha, con vexetación típicamente atlántica. Esta cuesta pindia pero de buen pasu y trazáu anchu ye la última ascensión de la ruta, y va regalanos no alto buenas vistas a la sierra L'Aramo.

Per buena pista avanzamos hasta Les Carangues, onde nos incorporamos a la carretera llocal que, dirección Tenebréu, vamos siguir pasando la collada La Rodada hasta dar col desvíu a la derecha pa tomar el camín de baxada a Tuñón.

Apreciamos la importancia d'esti camín no anchu del trazáu y nes imponentes paredes que lu bordean n'algunos tramos. La tierra ye oscuro y l'agua ta presente, de la que s'aprovecha la espadaña, planta amiga de lo húmedo. Alredor, castañales, ablanos, carbayos, humeros, acebos... más abaxo atoparemos texos. Algun árbol quiso echase sobre'l camín, pero dexando pasu pa continuar la nuestra caminata, qu'alterna tramos anchos con pasos estrechos, siempre con atención a la piedra sobre la que pisamos.

Ya viendo Tuñón ente los árboles, llegamos a un cruce con otru camín nel que vamos a la derecha pa volver al pueblu y dar por acabada la ruta.