I3. Zubitxo erreka: Mugiter, Izaskona

Ibilbidea Lezon hasiko dugu, herriaren sarreran Donibane kalea eta Hipolito Gezala kalea elkartzen diren lekuan; justu puntu honetan desagertzen da Zubitxo Erreka lurrazpitik Oiartzun ibaiaren bila. Erreka gure eskuitara dugula berari jarraituko diogu, Herriko eskola ezkerretara utzi eta aurrerago desagertuko zaigu. Zubitxo erreka, Gaintxurizketako bidearen aldamenetik dator, ekialdetik. 150m aldentzen bagara ikusiko dugu.
Hor azpian lotzen den Bekoerreka jarraituko dugu; horretarako, Jaizkibel etorbidea gurutzatu eta etxe tartetik, erreka nondik etor daiteken asmatuz, laster ikusiko dugu eta berari jarraituz bagoaz herri gunetik pixkanaka ateratzen.
Lezoko “Xoxolurra-Alarguntza” ibilbidea jarraituko dugu, hasieran Bekoerreka eskuitara dugula; ongi markatuta dagoenez, hauei kasu eginaz, erraz iritsiko gara Santiyo bidea bezala markatuta dagoen pistara. Pista honetan ezkerretara hartu eta metro gutxitara utzi eta eskuitara hartuko dugu; berehala, berriz eskuitara hesi bat pasa, eta ongi nabarmentzen ez den bidezidor bat igoko dugu; ehiziko postuak jarraituz. Berehala gaude Jaizkibelgo lehen dorrean eta GR121 bidean. Hau jarraituz, lehenik Mugiter(315m) pasako dugu; ondoren Izaskona(336m) eta aurrerago bigarren dorrea.
2. Dorretik, atzera 300m egin eta pista hartuko dugu. Berehala, bihurgunean, eskuitara hartu eta Santiyo bideko markak aurkituko ditugu. Hauek jarraituko ditugu, Lezoko bidea hartuz. Bide honek bihurgune handi bat egiten duen lekuan, utzi egingo dugu eta zuzenean doan bidea hartu. Orain Lezoko beste bide bat jarraituko dugu “Olazar Lorbide” bezala markatua, Plataiturri-ra iritsi arte. Bide honetan, lehendabizi Mukitar erreka pasako dugu eta ondoren Lorbide erreka gure ezkerretan dugula jaitsiko gara. Beherago, Kaserna etxerako bidera iristean, Mukitar errekarekin bat egin eta Algeposako pabiloiaren azpian desagertzen da.
Iturrian, ezkerrera doan bide zaharra hartu eta Urrileku baserrira eramango gaitu. Hemendik, aurrera, gelditzen den bideak hormigoizkoak dira. Lehendabizi, GI2638 errepidera iritsi, gurutzatu eta Maritxuenea etxe parean, eskubitara bailaratxo berde bat agertzen zaigu, Herriondo. Bertan, ikus daiteke nola adar ezberdinek Minkura erreka osatzen duten. Bidea jarraituz, Altamirara iritsiko gara; punturik altuenean, Lezo institutua dago; hau ezkerretara utziz, bere hesiaren aldamenetik bidexka jarraituz, Altzate igerilekua lehenik eta ondoren oinezko zubia pasa eta udal kiroldegira jaitsiko gara, berriro Zubitxo errekarekin topo egin eta honela ibilbidea amaituz.