Mina das Sombras dende a capela do Xurés. Lobios.

Moi boa ruta nunhas paraxes moi atraentes. Comeza onda a capela do Xurés á que se chega desviándose da "OR-312" na entrada da aldea de Vilameá. A ruta está sinalizada e perfectamente acondicionada e rozada. Case toda ela, ata o punto de destino, é unha subida constante e uniforme. Non entendo como outr@s camiñantes se queixan do camiño; é unha ruta de montaña, non un boulevard urbano! Segue o camiño que utilizaron os mineiros para levar o material ata a explotación, polo que está (estaba) lastrado e acondicionado con largura de carro.
A mina foi unha explotación de wolframio que funcionou dende 1932 ata 1976 (segundo indica o Panel colocado a carón da bocamina). A época de auxe foi, ao igual que noutros puntos de Galicia, a da II Guerra Mundial polo alto prezo que alcanzou este material para fabricación de armas.
O regreso pode facerse polo mesmo camiño de ida (aconsellable para persoas pouco preparadas para camiñar por monte aberto) ou como nós fixemos seguindo a pista que atravesa a parte alta da Serra dende preto da Portelo do Home. A certa altura atopamos un letreiro que dirixa cara a dereita. Peto hai un poste de camiño errado que ten toda a pinta de ser como pouco unha broma... Seguindo os estantes ou fitos de pedras que @s camiñante foron colocando (e os actuais debemos manter e mellorar) imos recorrendo o alto do monte e gozando dunhas vistas privilexiadas de toda a contorna. Axiña veremos a capela na súa pequena carballeira. En baixando bastante, chegamos a un piñeiral onde se fai difícil seguir a ruta se non é coa axuda do GPS (en todo caso non parece ter perda porque sempre se pode un dirixir cara a capela por recorrido improvisado). Seguindo cara a dereita a altura dunhas penas pequenas, enxergaremos indicios dun camiño e logo daremos co trazado de subida limpo. A capela está a catrocentos metros xa.
Respecto da meteoroloxía, neste día sufrimos unha calor abafante na baixada. Debe evitarse facela, pois, en horas e días de calor pero tampouco parece axeitado camiñala en día de moi mal tempo (vento e choiva) se facemos a volta por este trazado (pola ruta marcada non habería tanto problema porque decorre polo fondo do val).
En resumo: camiñada moi recomendable para persoas cunha apropiada condición física e en días de tempo moderado.
Feita seguindo esta: https://gl.wikiloc.com/rutas-sendeirismo/serra-do-xures-ruta-das-sombras-5781480