Mugarriluze eta Aumategi Elgeatik.

Elgeako obrak zirela eta, ezin izan dugu nahi genuen tokitik atera, Arrube auzunetik, alegia. Herriaren gainaldetik atera behar izan dugu, basotik jira eginez aparkalekuraino. Pistatik abiatzen da ibilbidea, eta nahiz eta berehala eskuinera egin, basoan zehar ibili ondoren hasierako pistara itzuli gara gure akatsa medio. Beraz, pistatik segitu aurrera, ezkerrera egin arte, eta basotik gora egingo dugu gainaldeko pistara ateratzeko. Metro gutxi egingo ditugu bide horretatik, berehala egingo baitugu eskuinera, erreka bidea bihurtua. Garai batean bidezidor garbia izango zen, baina gaur egun pinuak hartuta dago zati handi batean. Halako batean, bide garbira atera gara eta gainaldeko aerogeneradoreak ikusiko ditugu aurrez aurre. Aurrera jo eta txilar arteko bidexka segituko dugu goiko pistara ateratzeko, aerogeneradoreen pistara. Handik bost minutura dugu lehenengo tontorra edo buzoia, Mugarriluzekoa. Handik metro gutxira Historiaurreko megalitoa dugu, monolitoa, ikusi beharrekoa. Bista oso ederrak dira, Alabieta aldea. Argazkiak atera eta bigarrengo tontorrerantz joango gara. Aumategi bidearen azpian dugu Degurixa, zokune batean, Mairuatx erdian dagoela eta beste hainbat tontor. Hurrengo batean paraje hauetara etortzeko nahiko aitzaki. Haize handia dago Aumategiko tontorrean. Argazkiak atera eta behera. Bidean pasako dugu Arbe, ondoan XIX.mendean hildako baten hormigoizko gurutze oroigarri bat duela. Jaitsieraren bukaeran, gindoazen pista utzi eta eskuinera egingo dugu, igo garen pista aldera, utzitako autoetara joateko. Autoa Arrube auzoan utziz gero, jaitsitako pista horretatik jarraitu beharko dugu eta beherago egin eskuinera.