Muíños de Taboadelo (Ponte Caldelas)

Este fermoso percorrido entre as leiras, carballeiras e marxes dos ríos Riboi, San Vicenzo e Verdugo na parroquia de Taboadelo (Ponte Caldelas) non está sinalizado polo que se fai menester o uso de GPS.
A nosa meta non será soamente ver os muíños "Darriba" e "Dabaixo" restaurados pola Asociación Veciñal O Carballo, senón tamén o de coñecer unha contorna onde aínda se conservan en uso antigas congostras, moitas delas empedradas, e zonas con arboreda de frondosas e vexetación de ribeira fluvial.
Saíremos da igrexa de Taboadelo ao carón da estrada PO-206 para meternos no núcleo da aldea e logo por unha corredoira entre muros de pedra chegaremos a Chan do Casal. Proseguimos a beira dunha levada para as regas e pasados un muro e unha cancela, pisamos de novo a PO-207. A uns cincocentos metros baixaramos por un camiño a esquerda, atravesando unha carballeira, que nos conduce ao río Riboi.
Pola marxe do río acadamos dúas pontellas e a confluencia do río San Vicenzo. Logo, andando uns cen metros pola estrada PO-207, collemos unha congostra a esquerda para visitar a ermida barroca de San Vicenzo. Continuamos polo camiño empedrado que sube pola esquerda e, atravesando a estrada, camiñamos a media altura pola aba do val do río San Vicenzo, con extensas carballeiras.
Pasamos a aldeíña de Verduxo e baixamos buscando o río Verdugo. Chegamos a zona de lecer onde se atopan os muíños "Darriba" e de "Abaixo". Aquí faise anualmente a Festa do Muíño, con demostracións do seu funcionamento, mostras de artesanía e actuacións diversas.
Remontamos o río San Vicenzo e pasamos a outra beira pola fermosa ponte de Canedo. Toca agora subir para refrescarnos na Fonte Nova n´O Outreido. De aquí ao noso remate da andaina na igrexa de Taboadelo quedan só uns cincocentos metros.