Municipio de Ourense. Eirasvedras, Santa Comba, A Conchada.

Pequena e fermosa ruta dentro do municipio de Ourense (válida para confinamento municipal).
Comeza a carón da N-120 (estrada de Vigo), en Quintela, xunto ao Bricocentro Paradelo. Aquí hai lugar abondo onde estacionar, se se quere acceder en coche. Outros lugares onde comezar e estacionar son os aparcadorios das termas de Outariz (na OU-402 no outro lado do Miño) ou no das pozas do Muíño da Veiga. Facelo así ten o interese engadido de poder gozar das termas -cando funcionen!- ao rematar a camiñada.
Saíndo pola Rúa das Carballas a uns 400m xa se colle camiño vello que sobe cara as ruínas do mosteiro de Santa Comba das (de) Naves. A subida pode facerse por dúas variantes. A presente é un chisco máis longa pero tamén máis descansada. Está indicado, cun waypoint o punto onde escoller.
O mosteiro das Naves non é a penas coñecido. Trátase dunha fundación medieval (posiblemente século IX) que logo pasaría a depender do mosteiro de Celanova. Para máis información, por exemplo, mirar esta páxina: https://www.galiciamaxica.eu/galicia/ourense/naves/ É de propiedade particular e recentemente cambiou de dono co proxecto de dedicalo a hotel. As portas foron pechadas vai meses pero as portas están arrombadas, tanto a do edificio principal coma a da pequena capela que está uns metros máis abaixo. Todo o conxunto está engulido pola vexetación.
Seguindo polo camiño que chegamos, un pouco máis arriba das ruínas, torcemos en dirección a aldea da Conchada. Nun punto intentei acceder pola parte sur da mesma pero non conseguín atopar o camiño certo. A ver se outro día!
A aldeíña da Conchada é moi curiosa e está coidada con certo esmero. Mesmo un particular recadou multitude de obxectos de cultura popular constituíndo un pequeno museo. Mágoa que este home faleceu vai anos e xa non o mostra.
Volvendo á entrada da aldea collemos outro camiño, indicado cuns carteis descoidados como "Vista panorámica", e que nos conduce cara o túnel do AVE e a localidade de Canedo. A baixada aquí é importante pero por camiño (nun punto baixo pola devasa, moi pina, do gasoduto pero non é imprescindible). Atravesamos Canedo (antigo núcleo do Pazo) e Eirasvedras e xa estamos na N-120 e no lugar de comezo/fin.
A ruta non está sinalizada polo que ven ben usar GPS. Os camiños están bastante limpos aínda que o piso non está erosionado polas augas (logo de choivas a auga corre por eles, atención ao calzado!)
Como se observa ten bastante desnivel.
Caso de querer comezar en Outariz ou no Muíño da Veiga, pódese mirar esta ruta miña que fai outro percorrido pero que coincide na subida (aínda que collendo o camiño máis empinado): https://gl.wikiloc.com/rutas-sendeirismo/ourense-ruta-dende-outariz-polas-naves-a-untes-con-atranco-alagamento-na-volta-65468194