O paraiso espido

Ao abrigo da Costa da Vela e xa na bocana da Ría de Vigo esténdense varias praias de fina e branca area polas que discorrerá a nosa andaina: Santa Marta, Liméns, Temperáns, Os Castros ou praia das Moscas e dentro da Zona de Especial Conservación as de Nerga, Viñó e Barra, completándose o circuíto por Donón e os piñeirais dunares.

Pódese comezar na praia de Liméns, con bo acceso e aparcadoiro para coches, e indo polo interior axiña acadamos camiños que nos levan entre piñeiros que medran sobre un substrato dunar e que abrangue a parte de terra adentro das praias de Nerga, Viñó e Barra.

Pasamos sobre o rego de Donón e subimos ata a Caracola, escultura feita con tubos metálicos polo moañés Lito Portela. Desde este punto teremos engaloiantes vistas sobre os altos cantís da Costa da Vela, as Illas Cíes e o Monte do Facho, antigo castro celta.

Baixamos pola bacía do rego de Donón por fragas e humedais ata a praia naturista de Barra, unha das máis importantes de Galicia. O nudismo comezou na costa de Cangas e en Galicia nos anos 70, practicado por turistas alemáns e todos lembramos ao profesor Miguel Cancio e aos integrantes do movemento “ Tetiñas e Piroliñas Free” correndo diante dos paisanos que os perseguían pola praia de Baroña nos anos 80.

Ao seguir de Barra temos os areais de Viñó e Nerga que posúen un dos sistemas dunares máis importantes da provincia de Pontevedra. De aquí a seguinte praia a costa é abrupta con dous pequenos areais, o das Moscas e o de Temperáns. Chegamos a Liméns, cunha lonxitude para o baño duns 300 metros e pegada está a praia de Santa Marta. Só restan uns pasos para volver ao punto de inicio en Liméns.