O Santo do río Arnoia (Ramirás, Cartelle)

O Santo non é outro que San Bertolameu, a cuxa capela chegaremos logo dunha fermosa camiñata polas beiras do río Arnoia e seu afluente o Tuño.
Comezamos nosa andaina na aldea de O Viso (concello de Ramirás), pasando por súa igrexa de Santo Antonio e seguindo entre piñeiros para ir baixando a procura do río Tuño. Ao chegar a súas frondosas beiras, acompañámolo augas abaixo ao longo duns catrocentos metros e podendo estar a vexetación un pouco crecida e dificultarnos, ainda que non imperdirnos, o noso paso.
A partires da desembocadura do Tuño o camiño xa é moi doado porque os sendeiros de pescadores aquí están ben limpos. A vexetación de ribeira é abondosa e formada por amieiros, salgueiros, abeleiras, estripeiros e outras árbores típicas do bosque de galería.
Pasamos polos restos de dúas pontes derrubadas, véndose da outra beira do Arnoia algún muíño e acadamos a área de lecer de Pontenova onde hai unha zona de baño e moitas mesas a sombra dunha grande carballeira.
Cruzamos o río pola ponte peonil ou por riba do muro da represa e agora imos pola outra marxe, que pertence ao concello de Cartelle. Anima a nosa vista unhas coloridas pinturas sobre as rochas e feitas por un artista de Cartelle e entre densas arboredas chegamos a zona de A Barca, onde hai un pequeno embarcadoiro.
Por un intre abandonamos o río para subir ata a capela de O Santo (San Bertolameu) que está feita sobre unha antiga ermita e cunha fermosa contorna. Aquí damos volta sobre nosas pegadas para rematar na área de lecer de Pontenova.