I12.3. Urdaniturri erreka: Ermotxipi, Egiedergaña, Irartelordikogaña, Munttegixabala, Aparolakokaxkua, Isturitzakaskoa

Ibilbide honek Urdanitibar arroaren barnean dauden sei kasko lotzen ditu. Hasera puntua Urdanitibar zubia izango da. Zubi hau, Urdainturri baserritik Astigarraga aldera, 200m tara dago (GI-2132, km 12,8). Gorantz doan hormigoizko bidea hartu eta ezkerrera daukagu Ermotxipi (78m) mendia; kaskora ailegatzean, hor dauka bertarako bidea, baina etxea dago eta eremu pribatua da.
Bidea beherantz doa orain erreka bazterrera: Semperelarre (Xenpelar) erreka; berehala ezker isuritik Lamixolo erreka gehitzen zaio. 20m aurrerago beste erreka elkartzen da, eskuineko isuritik: Egieder erreka. Honi jarraitzen dion bidea hartuko dugu ezkerrera, Egieder baserrira eta handik Egieder gainera (128m). Berriro behera egingo dugu bidegurutzera eta beste bidea hartu Trabaleku aldera igotzeko. Orain erreka ezkerretan daukagu eta eskuin isuritik Urdanzolo erreka gehitzen da. Bide nagusia utzi eta pista zaharren zehar zuzen zuzen igoko dugu; Trabaleku baserrira iritsi aurretik, Irartelordiko kaskoa (173m), berdea, bisitatu eta baserria eskuinera utziz, gora egingo dugu; ezker-eskui bi aukera daude, biek ere Arkaitza baserrira doan hormigoizko bidera eramango gaituzte. Bide hau, beherantz egin ondoren, bidegurutzean eskuinera haruko dugu eta berehala iritsiko gara BarinGarateGoikoa baserrian. Hau ezkerrera utzi eta bidean gora, zuzen-zuzen Aldurako lepora aterako gara.
Ibilbidearen punturik altuenean gaude. Hemen, Idoia (Susperregi) aldera doan PRa hartu. Bide erdian, bi erreka gurutzatuko ditugu, Antxulo errekari hasiera ematen diotenak. Berehala aterako gara Idoia-Susperregi jatetxera. Hau ezkerrera utzi eta bide zaharretik joango gara beherantz, Susperregi zaharra ere ezkerrera utzita. PRan jarraitzen dugu. Hormigoizko bide nagusira iritsitakoan, eskuinera hartu eta berehala markek ezkerrerako bidea hartzen dute. Puntu honetan, gure ezkerrera Aizpitarteko gaina daukagu eta eskuinera Muntegixabala (296m); nik ez diot biderik aurkitu. Errepidez jaitsi naiz ea igobiderik aurkitzen nion baina dena oso itxia dago.
Barrengoloia pasa eta errepidez markak jarraituz, Listorretako parkean sartuko gara. Hemendik abiatzen da Errenteriako Beraun auzora doan PR-a; hau hartu eta berehala Santiago bidean ere bagaudela konturatuko gara. Bide hau jarraituko dugu Frantsila zaharra baserrira iritsi arte; hemen utzi eta eskuinera egingo dugu, Aparolako kaskoa/Utzabaleta (149m)-ra heltzeko.
Ondoren, Aparola baserriaren aldamenetik pasa eta pistari jarraituz Mizpirazarreta errekaraino jaitsiko gara; hau gurutzatu eta ezkerrera doan bidea hartu; berehala bidea ataka batek ixten du pasoa eta eremu hesitua aurkituko dugu; hesiaren aldamenetik, bide garbirik gabe goiko Santiago bidera atera arte nahiko sasi eta zuhaixka gainditu beharko ditugu. Behin bidea aurkituta, gainez gain Oiartzabal baserrira lehenik, ondoren Isturitza goikoa eta bere lurretan Isturitzako kaskoa (123m). Itzuli Oiartzabal baserrira eta beste eskuinera doan pista hartuz, Anerre zahar Landetxera aterako gara eta hemendik abiapuntura jaitsi.