Oleta, Samiño, Gurutzeta. Zumarragako Aginaga auzotik zirkularra

Samiño mendia, Euskal Herriko 100 mendi zerrendetan dago. Ibilbide zirkularra egitearren beste batzuek ere igoko ditugu.
Hasiera, Zumarragako Aginaga auzoan emango diogu; bukatu ere bertan. Bertara iristeko, Zumarraga eta Azkoiti lotzen duen GI-631 errepidea hartu eta, bere 31,6 puntu kilometrikoan abiatzen den GI-3803 errepidea 3km jarraituz helduko gara auzora.
Oinez hasi eta berehala, ezkerrera Muxika baserria utzi ondoren, eskuineko bidea hartuko dugu. Oleta mendiaren oinera iritsita, pista utzi eta iratze eta belar tartetik doan bidezidorra igoko dugu; lehen gaina, Oñamendi (837m; 42min). Orain gainez-gain jarraituko dugu. Berehala dago Oleta (841m; 46min).
Trikuharria eta txabola pasa ondoren, basora iristean, pista utzi, hesia pasa eta gorantz doan bidezidorra hartu. Itzuleran, utzi dugun pista horretatik etorriko gara. (Edo ez; nik oso lokaztuta aurkitu nuen eta hala balego, hobe igoko dugun bide berdinetik itzultzea).
Berehala, Samiño-Iruarrieta erpin geodesikoa, eta 50m aurrerago, Samiño-Iruarrieta, buzoia (933m; 1h 15min). Orain iparraldera gainez-gain jarraituz, Gurutzeta, (928m; 2h 20 min); Azkoitia eta Azpeitia arteko mugan. Hemendik, hego-mendebaldera Iruarritako txabola dotorea ikusiko dugu; bertara hurbildu eta hemen dauzkagu bi aukerak: eskuinera jaitsi eta lokaztutako pistara atera, edo zertxobait gora egin eta gutxi-gora behera igo dugun bidetik garbitik jaitsi.
Trikuharriraino bide berdinetik jaitsi eta orain zertxobait eskuinera jo eta Oleta ezkerrera utziz, bide zabala jarraitu. Oleta mendi lepora aterako gara; aterpe txukuna eta tumulua. Eskuinera, Oleta-Txiki daukagu (777m; 2h 05min). Bertara igotzeko ataka pasa eta onena berriz ere bertara itzultzea da, ze goian alanbre hesia pasatzeko ez dago pasabide egokirik.
Ezkerrera berriz, Pagozurieta (796m; 2h 10min); mendi sasitsua. Pistara itzuli.
Pistatik jarraituz helduko gara Aginagara.