Ons, a ínsula Aunios

Enclavada na bocana da ría de Pontevedra, esta illa a que Plinio O Vello cita como ínsula Aunios forma parte do Parque Nacional Marítimo Terrestre das Illas Atlánticas de Galicia.
Cos seus 5 Km de longo e 1,5 Km de ancho é a segunda illa máis grande de Galicia, logo da de Arousa. O seu perfil suave cunha cota máxima de 128 m no Alto de Cucorno faina axeitada para un paseo tranquilo.
Habitada por un reducido número de persoas, a súa poboación multiplícase nos meses do estío cando funcionan os servizos de transporte marítimo desde Bueu, Sanxenxo e Portonovo.
É lugar de cría de numerosas aves mariñas, sendo a vexetación predominante o monte baixo con algúns salgueiros e bosquetes de piñeiros. Xunto con Onza, pertence ao concello de Bueu.

O percorrido farémolo polos seus vieiros de terra seguindo case sempre o perímetro. Saíndo do peirao na Punta do Almacén (con servicios de hostelería) a altura da nova igrexa de San Xaquinciño collemos a dereita cara a praia nudista de Melide e faremos un desvío de ida e volta ata a Punta Centolo (con boas vistas) e o mesmo ca Punta Xubenco.
Seguiremos polo camino costeiro que dá a mar aberto e se andamos con sede achegamonos a fonte do Gaiteiro antes de subir ata o faro no cimo da illa. En Chan da Pólvora está a zona de acampada e o noso destino será a furna do Burato do Inferno.
Na punta máis meridional, desde o miradoiro de Fedorentos, a nosa vista deleitase na illa de Onza e Illas Cíes. Pola costa leste pasamos polos núcleos de poboación habitados de O Pereiro e Canexol (coa capela primixenia de San Xaquín) para finalizar no embarcadoiro da illa.