Outariz, Santa Comba das Naves e volta por Untes.

Pequena ruta cercanca a Ourense que permite tanto saír do asfalto coma gozar de espectaculares panorámicas e outros elementos interesantes. O punto de partida é o aparcadoiro das termas de Outariz. Tras pasar a carón delas (tanto públicas coma do balneario), contorneamos tamén as do Muiño da Veiga (coma tantas veces alagadas polas crecidas do Miño). Pasamos baixo a N-120 e atopamos outro aparcadoiro que podería ser tamén un acaído punto de comezo da ruta. Continúase por entre as naves comerciais e logo iníciase a subida xa por vellos camiños empedrados e gastados polas rodas no transcursos dos séculos. A certa altura achamos as ruínas do descoñecido mosteiro de Santa Comba das Naves que máis que requintes arquitectónicos chama a atención pola súa solidez, exemplo de potencia econónica. Parece ser que de orixe baixomedieval, debeu ser un priorato dependente de Celanova.
No percorrido atravesamos tamén a aldea de Untes, pasando a carón da súa igrexa como edificio máis sobranceiro.
O retorno, tras atravesar a vía a nivel, faise pola beira do Miño mediante o abandoado paseo que noutrora se estendía ata case Santa Cruz (Pazo de Ramirás). Porén este carroucho está fóra de uso xunto ao enlace da Autovía por mor dun preito que obrigou a restablecer unha finca particular. A xente segue atravesándoa pero hai un piñeiro grande atravesado con ánimo de impedir o tránsito dos camiñantes e ciclistas. Cumpriría que o Concello de Ourense arranxase a situación.
Finalmente teremos a oportunidade (buscada) de tomar un baño relaxante nas pozas da Burga de Canedo ou nas máis pequenas de Outariz. Tamén no balneario, que para gustos...
A ruta ten unha pequena dificultade só polo desnivel. Moi interesante e totalmente recomendable.
Feita a partir desta:
https://es.wikiloc.com/rutas-senderismo/ourense-comarca-de-ourense-ourense-ruta-circular-outariz-a-conchada-13901319
aínda que suprimindo a visita á Conchada (interesante, tamén, para quen non a coñeza).