Pachote - Pazos - Pedrón - Muíño de Ferreñas - Pachote (Torres - Vilarmaior)

Galego

Este roteiro transcorre polos termos municipais de Vilarmaior e Monfero. A zona máis interesante é a que transcorre polas fragas dos ríos Andoriña –augas abaixo recibe o nome de Baxoi- e Vilariño, que ao mesmo tempo serven de linde entre os dous concellos.
Empezamos a camiñar no lugar de Pachote, da parroquia de Torres, pertencente a Vilarmaior e facémolo en dirección a Sestelo e desde alí imos virando cara á esquerda ata atopar un lavadoiro restaurado e ben conservado. Nese punto, que será tamén onde chegaremos á volta, tomamos á dereita e continuamos por unha estrada estreita asfaltada; por ela cruzaremos unha pequena ponte sobre o río Vilariño penetrando no concello de Monfero.
Máis adiante, no Salto, viramos á dereita ascendendo por unha pista asfaltada e pasadas unhas decenas de metros tomamos á dereita por un camiño sen asfaltar, iniciando a subida cara a Pazos. Alí continuaremos á esquerda e seguiremos pasando por diante de varias casas ata chegar a un cruzamento no que viramos á dereita en dirección a O Pedrón. Continuamos pola esquerda e pasada a últíma vivenda iniciamos o descenso por un camiño sen asfaltar que transcorre en paralelo ao curso do río Andoriña e polo que imos penetrando na fraga. Tanto esta como a do Vilariño manteñen na súa parte máis baixa unha flora típica das fragas, con árbores de folla caduca como castaños, carballos, bidueiros, salgueiros, etc. Pero segundo ascendemos do río o eucalipto invade a paisaxe.
O roteiro, aínda que non está sinalizada en ningures do percorrido, é fácil de seguir con tal de non apartarse do camiño máis ancho.
Xa na zona máis baixa observaremos un lugar no que hai un desvío á dereita que conduce a unha minicentral hidroeléctrica (oiremos o ruído da turbina). Deberemos seguir de fronte, pero no caso de que chovese moito e atopemos máis adiante o carreiro asolagado, quizá sexa mellor dar a volta e ir en dirección á minicentral pasando polo camiño que hai ao costado e incorporándonos a unha estrada que nos levará ao mesmo lugar onde chegariamos polo tramo asolagado, que é a ponte sobre ao Andoriña xusto no lugar onde desemboca o Vilariño e no que volvemos entrar no concello de Vilarmaior.
Camiñamos á beira do río ata chegar ao lavadoiro e o muíño de Ferreñas, á dereita existe unha área de recreo onde están instaladas grelladas de pedra e mesas e bancos para comer. É un bonito lugar para descansar un pouco e contemplar as dúas mostras de arquitectura popular rural. Proseguimos ao bordo do río ata chegar a unha ponte por onde seguiremos cara á esquerda subindo cara á Viaxe. Se nos queremos apartar un pouco do roteiro podemos visitar a capela de San Ramón á dereita. En calquera caso deberemos despois seguir pola esquerda con rumbo a Arnelas que deixaremos abaixo á esquerda. Descendemos pasando á beira dunha casa que nos quedará á dereita e que seguramente foi unha ferrería polas inscricións que ten na pedra sobre a porta da fachada que dá á estrada pola que chegaremos a unha ponte sobre o río Vilariño. Dende alí continuamos pola marxe dereita do río, en sentido ascendente, por un carreiro de terra que non abandonaremos en ningún momento ata chegar a un lugar no que se incorpora outro camiño pola dereita; punto no que xa veremos, á esquerda, o lavadoiro do principio. Desde aí continuaremos seguindo o mesmo camiño que ao comezo para chegar ao sitio de inicio nas inmediacións dun bar restaurante que alí hai.

Castellano

Esta ruta transcurre por los términos municipales de Vilarmaior y Monfero. La zona más interesante es la que transcurre por las fragas de los ríos Andoriña –aguas abajo recibe el nombre de Baxoi- y Vilariño, que al mismo tiempo sirven de linde entre los dos ayuntamientos.
Empezamos a caminar en el lugar de Pachote, de la parroquia de Torres, perteneciente a Vilarmaior y lo hacemos en dirección a Sestelo y desde allí vamos girando hacia la izquierda hasta encontrar un lavadero restaurado y bien conservado. En ese punto, que será también adonde